Qazaq ádebıeti tarıhynda óshpes iz qaldyrǵan aqyn Sara týraly jınaq jaryqqa shyqty
«Sara Tastanbekqyzy qazaq ádebıeti tarıhynda óshpes iz qaldyrǵan óz zamanynyń sháıir aqyny. Al Birjan men Sara aıtysy búginde qyz ben jigit aıtysynyń qaıtalanbas úlgisine, qazaq óneriniń rýhanı murasyna aınalǵan. Bul jınaqqa aqyn Saranyń óleńderi men aıtystary, sonymen qatar ónerpaz qyzdyń óneri men ómir jolyn arqaý etken maqalalar, estelik áńgimeler, aqyn ónerine bas ıgen aqyndardyń óleń-jyrlary toptastyryldy», - deıdi jobanyń jetekshisi ári ıdeıa avtory, Qazaqstannyń eńbek sińirgen qaıratkeri, jazýshy Shárbaný Beısenova.
«Negizi ol qazirgi aqyndarsha óz óleńderin jazyp qaldyrmaǵan, kezi kelgende aýyzsha aıtqan, solaı taratqan. Soǵan kezinde bir jyrynda «Qaǵazǵa jalǵyz sózim túspegen soń, Umtylyp qalar Sara qur ańyz bop» dep nalasyn da aıtqan eken. Sol sózi bizge qatty áser etti. Sol kisiniń óleńderin jınastyryp, búgingi oqyrmanǵa tanytýdy ózimizge maqsat tuttyq», - dep atap ótti ol.
Tusaýkeser rásimge aqyn-jazýshylar, Parlament depýtattary, belgili zııaly qaýym ókilderi qatysty.
Sara Tastanbekqyzy (1878-1916) - aıtysker aqyn. Týǵan jeri - qazirgi Almaty oblysynyń Qapal aýdany. Sara Tastanbekqyzynyń Birjan salmen aıtysy ǵasyrdan ǵasyrǵa úzilmeı jalǵasyp kele jatqan qazaqtyń aıtys óneriniń shoqtyǵy bıik, kórkem úlgisi bolyp sanalady. Aqynnyń bul aıtystan basqa «Júrek», «Ashyndym», «Arsalań aǵa aldynda», «Júrek syry», « Jaılaýda», « Ábishtiń arýaǵyna», « Hosh bol, elim» sekildi kóptegen óleńderi men «Tuzaq» atty dastany bar.