«Kazahstanskaıa» shahtasynyń úsh kenshisi metanmen ýlanyp, aýrýhanaǵa jetkizildi
QARAǴANDY. KAZINFORM - Jedel járdem «Arselor Mıttal Temırtaý» aktsıonerlik qoǵamyna qarasty «Kazahstanskaıa» shahtasynyń metanmen ýlanǵan kenshilerin aýrýhanaǵa jetkizdi. Metan 31 tamyz kúni tańǵy saǵat 4-00-de taraǵan, dep habarlaıdy QazAqparat tilshisi.
«Japa shekkender oblystyq medıtsına ortalyǵyna jetkizildi. Úsheýiniń densaýlyǵy qalypty. Olarǵa orta deńgeıde ýlanǵan degen dıagnoz qoıyldy»,-dep habarlady Qaraǵandy oblystyq densaýlyq saqtaý basqarmasynyń baspasóz hatshysy Aıjan Isa.
Budan bólek taǵy bir shahta jumysshysy metanmen ýlanǵan, alaıda onyń jaǵdaıy aýrýhanaǵa jatqyzýdy qajet etpedi.
«1976 jyly týǵan shahta jumysshysy osy kezde ambýlatorııalyq em qabyldaýda», -dep habarlady Aıjan Isa.
Eske salyp ótsek, polıtsııa «Arselor Mıttal Temırtaý» aktsıonerlik qoǵamynyń Kómir isi jónindegi departamentiniń «Kazahstanskaıa» shahtasynda eńbekti qorǵaý erejesiniń buzylǵandyǵy jónindegi qylmystyq isti qaraýda.
Atalǵan fakt QK-tiń 156 baby, 4 bóligi boıynsha «Eki jáne odan da kóp adamnyń ólimine alyp kelgen eńbekti qorǵaý erejesin buzý» áreketi retinde baǵalandy. Qylmystyq is naqty bir adamǵa qatysty emes, tek birneshe adamdar tobynyń baǵytsyz jaǵdaıǵa ushyraý faktisi boıynsha qaralýda.
