«Kazahstanskaıa» shahtasynda qaza tapqan kenshilerdiń artynda alty bala jetim qaldy
QARAǴANDY. QazAqparat - 31 tamyz kúni tańǵy saǵat 4-te «Arselor Mıttal Temirtaý» aktsıonerlik qoǵamyna qarasty «Kazahstanskaıa» shahtasynda metan gazy taraýyna baılanysty bolǵan qaıǵyly oqıǵadan keıin alty kishkentaı náreste men áli dúnıege kelmegen bir ishtegi bala ákesiz qaldy, dep habarlaıdy «QazAqparat» HAA tilshisi.
«Rústem Ahmetjanovtyń jasy 34-te bolǵan, úsh balanyń ákesi. Valerıı Rýdenko 37 jasta, eki balasy jetim qaldy. Maksım Shebanov - 31-de, bir balasy bar», - dep habarlady «ArselorMıttal Temirtaý» kompanııasynyń baspasóz qyzmeti.
Maksım Shebanovtyń áıeli ekinshi balasyna júkti. Qaza tapqan kenshilerdiń týysqandary úshin bul orny tolmas qaza boldy, barlyǵy qandaı da bir málimdeme berýden bas tartty. Valerıı Rýdenkonyń kórshisiniń aıtýynsha, kenshi eki balasymen qatar, qos jıenin de materıaldyq turǵydan qamtamasyz etip otyrǵan.
«Bizdiń qalamyzda árbir eki otbasynyń biri - kenshi. Áýlet bolyp kómir óndirisine jumys isteıdi. Sol sebepti úsh adamnyń qazasy - jeke otbasynyń ǵana emes, tutas Shahtınsk qalasyna ortaq qaıǵy. Qaıtys bolǵandardyń ekeýi - Novodolınka aýylynan», - dedi Alla Gavrılova.
Aıta keteıik, 31 tamyz kúni tańǵy saǵat tórtten asa AGQ (avtomattandyrylǵan gaz qorǵanysy) operatory taý dıspetcherine 332 D6-1-3 jeldetkish túıisiminde metan kenjardy baqylaý tetiginen baılanys joǵalǵany týraly jáne shahtanyń batys jeldetkish uńǵysynda metan deńgeıiniń kóterilgenin habarlaǵan. Shahta basshylyǵy tez arada jaǵdaıdy anyqtaý sharalaryn júrgizgen: kenjarǵa Kásibı áskerılendirilgen apattyq qutqarý qyzmetiniń eki bólimshesi men sol ýchaskeniń taý sheberin jibergen. Tańǵy saǵat 6-da úńgýshiler osy kenjardan óli kúıinde tabyldy. Aldyn ala derek boıynsha qaıǵyly jaǵdaı kenetten metannyń (gaz dınamıkalyq qubylys) taralýy saldarynan bolǵan. Oqıǵa kezinde shahtada 132 adam bolǵan, onyń 129-y apatty joıý josparyna sáıkes ózderi jerdiń betine shyqqan.
Kásibı áskerılendirilgen apattyq qutqarý qyzmetiniń 49 qyzmetkeri men 9 tehnıka apatty joıý jumystaryn júrgizýge tartyldy. Shahtadaǵy jumys ýaqytsha toqtatyldy. Oqıǵanyń mán-jaıyn anyqtaý úshin arnaıy memlekettik komıssııa quryldy, tergeý júrip jatyr. Tergeý nátıjesi komıssııa jumysy aıaqtalǵannan keıin belgili bolady.
