«Kazahı» komandasynan úırengenimiz kóp - Azamat Musaǵalıev
ASTANA. QazAqparat - TMD elderine tanymal «Azııa MIX», «Kamyzıak ólkesiniń quramasy», «Pıatıgorsk qalasy» KVN komandalary Astanaǵa keldi, dep habarlaıdy QazAqparat HAA tilshisi.
Eske sala ketsek, Astana kúni men «EKSPO-2017» halyqaralyq mamandandyrylǵan kórmesi aıasynda 1 shilde kúni KVN joǵary lıgasynyń jazǵy kýbogy alǵash ret Astanada ótedi. Keshti úlken Aleksandr Maslıakov júrgizedi.
Olga Kartýnkova, Eldııar Kenensartov, Azamat Musaǵalıev syndy eń úzdik komanda ókilderi búgin Astanada «KAZAXI» komandasymen jáne jýrnalıstermen kezdesý ótkizdi. Kezdesý barysynda «Kamyzıak quramasynyń» kapıtany Azamat Musaǵalıev qazaqstandyq komanda týraly óz pikirimen bólisti.
«Bizdiń komanda úshin bul oıynǵa qatysý úlken mártebe. Shyn máninde bul oıyn óte mańyzdy, sebebi bizdiń KVN oınamaǵanymyzǵa bir jyl boldy. «Kazahı» - biz úshin aty ańyzǵa aınalǵan komanda, osy komandanyń oıyndarynan kóp nárse úırendik», - dedi ol.
Máslıhat barysynda KVN juldyzdaryna jergilikti mentalıtetti tolyq bilmeı, qazaqstandyq avtorlardyń kómegine júgindińizder me degen suraq qoıyldy. Ázilqoılar Qazaqstanǵa jıi keletinderin, mundaǵy ómir saltymen jaqsy tanys ekenderin jetkizdi.
«Biz munda mereke jasaý úshin keldik jáne ol úshin 40 avtor jaldaǵan joqpyz. Barlyq ázildi ózimiz qurastyrdyq, onyń ústine Qazaqstanǵa birinshi ret kelip otyrǵan joqpyz. Qazaqstan bizdiń ekinshi úıimizge aınaldy, sondaı qonaqjaılyqpen qarsy alady, sondyqtan jergilikti taqyryptar jóninde qaljyńdasý biz úshin qıynǵa soqpaıdy», - dep jaýap berdi A.Musaǵalıev.
Aıtýly kesh 1 shilde kúni Qazaqstan ortalyq kontsert zalynda ótedi jáne bul shara Astana qalasynyń ákimdiginiń qoldaýymen uıymdastyrylǵan.
