«Qazaǵy az sport túrlerine qarakózderimizdi qalaı tartamyz?» - respýblıkalyq basylymdarǵa sholý
***
«Parlament Senatynyń Tóraǵasy Qaırat Mámı Reseı Federatsııasy Federaldy Jınalysy Federatsııa Keńesi Komıtetiniń múshesi, TMD PAA baıqaýshylar toby úılestirýshisiniń orynbasary Vadım Gýstov bastaǵan TMD PAA-nyń Parlament Senaty depýtattary saılaýyn baıqaý jónindegi delegatsııasyn qabyldady», - dep jazady el gazeti «Egemen Qazaqstan». Basylymnyń atap ótýinshe, Parlament joǵary palatasynyń depýtattaryn saılaý monıtorıngine qatysqany úshin TMD PAA mıssııasyna rızashylyǵyn bildire kelip, Senat tóraǵasy «Dostastyq elderi depýtattarynyń tarapynan Qazaqstandaǵy saılaýdy baıqaý jaqsy dástúrge aınaldy»,-dedi. Maqala «Ázirlikke oń baǵa berildi» degen taqyryppen jaryq kórdi.
«Egemen Qazaqstan» gazetiniń jazýynsha, keshe Aqordada Qazaqstan Respýblıkasynyń Memlekettik hatshysy Qanat Saýdabaevtyń tóraǵalyǵymen Shetelderde kadrlar daıarlaý jónindegi respýblıkalyq komıssııanyń májilisi bolyp ótti. «Ústimizdegi jyldyń 4 shildesi men 5 tamyzy aralyǵynda júrgizilgen konkýrstyq irikteýdiń qorytyndysy boıynsha «Bolashaq» halyqaralyq stıpendııasyn taǵaıyndaý úshin respýblıkalyq komıssııa qaraýyna 577 úmitkerdiń ótinishi engizilipti. Onyń ishinde kóptegen úmitker qarjy, quqyq, ekonomıka, munaı-gaz isi salasyna qatysty mamandyqtardy tańdaýǵa qulyqty ekendigin baıqatqan. Sonymen qatar, aqparattyq tehnologııalar men júıeler; baılanys jelileri jáne kommýnıkatsııa júıeleri; kóp kanaldy telekommýnıkatsııalyq júıeler; radıo baılanys; radıo habarlamalar jáne televızııa mamandyqtary jastardyń qalaýy ekendigin kórsetip otyr», - depti jıyn barysynda Q.Saýdabaev. Maqala «Sapaly bilim - salıqaly sheshim jemisi» degen taqyryppen berilgen.
***
Qazaqstanda qarttar úıi, onyń ishinde qarttar úıine tapsyrylyp jatqan qarııalar, al onyń ishinde qazaq ata-ájeleriniń qatary kóbeıip bara jatqany alańdatady. Keńestik kezeńde ornyǵyp, keıin Batystan bap alyp jatqan dástúr bul. Áıtpese qazaq halqynda áke-shesheni eshqashan shet qaqpaǵan, olardyń orny árdaıym tór bolatyn. Osy oraıda almatylyq ardagerler úıiniń turǵyndary «ata-anasynan bas tartqan balalar aıyppul ne alıment tólesin» degen usynys tastap otyr. Qoǵamǵa túsken jegi qurt jaıly «Aıqyn» gazetindegi «Ata-anasyn aıalaı bilmegender aıyppul tólesin...» degen taqyryptaǵy maqalada keńinen baıandalǵan. «Obaly ne kerek, elimizde qarttarǵa qamqorlyq jasalmaı jatyr deýge bolmaıdy. Jańa zamanǵa laıyq qarttar úıleri salynyp, olardyń óz bos ýaqytyn paıdaly da qyzyqty ótkizýine jaǵdaı jasalýda. Degenmen bul qubylystyń ózi durys emes ekendigin jasyrýǵa bolmaıdy», - dep jazady basylym.
***
«Shekaradan shý shyqpasyn». Osy taqyryppen «Aıqyn» gazetinde jaryq kórgen maqalada ústimizdegi jyldyń ótken aılarynda elimizdiń memlekettik shekarasyn buzýǵa áreket jasaǵan 18 myńnan astam adamnyń jolyna tosqaýyl qoıylǵandyǵy jaıynda baıandalǵan. Sonymen qatar qazaqstandyq shekarashylar talmaı júrgizip kele jatqan mańyzdy is-sharanyń biri, ol - shetel valıýtasy men qymbat baǵaly asyl zattardyń kontrabandalyq jolmen syrtqa shyǵarylýyna batyl tosqaýyl qoıý. Mysaly, osy jyldyń ótken jarty jyly ishinde jaýyngerler shekaradan zańsyz asyrylmaqshy bolǵan 606 myń dollardy jáne jalpy quny 570 myń AQSh dollaryn quraıtyn salmaǵy 14 keli altyn áshekeı buıymdaryn tárkiledi.
***
«Alash aınasy» gazetiniń jazýynsha, Ystambulda Islam yntymaqtastyq uıymy atarýshy komıtetiniń tótenshe otyrysy ótti. IYU Syrtqy ister mınıstrler keńesiniń tóraǵasy - QR Syrtqy ister mınıstri Erjan Qazyhanovtyń tóraǵalyǵymen kezekten tys tártipte bas qosqan ıslam elderi ókilderi Somalıdegi gýmanıtarlyq daǵdarysty eńserý hám eldiń keleshek saıası ahýalyn saralaýǵa jınalǵan. «Ramazan aıyndaǵy saýapty sharaǵa negizdelgen alqanyń nátıjesi jaman emes. Musylman elderi ashtan qyrylýdyń aldynda turǵan Smalı halqyna gýmanıtarlyq jylý retinde 350 mln AQSh dollaryn jınady», - dep jazady basylym. Maqala «IYU Somalı qasiretin eńserýge 350 mln dollar aýdarady» degen taqyryppen berilgen.
Shyny kerek, keıde qazaqtyń qara domalaqtary tek boks, fýtbol jáne kúres túrlerin ǵana serik etetindeı kórinetini jasyryn emes. Osy sport túrlerinen ǵana qazaq balalaryn jıi kezdestiremiz. Al basqa sport túrlrin alyp qarasaq, bárinde de ózge ult ókilderi oza shaýyp júr. Sonda qalaı, qazaq balalary jeńil atletıkaǵa, sporttyń qysqy túrlerine, sýda júzýge beıim emes pe? Mine osy jaıttyń syryn ashýǵa talpys jasaǵan «Alash aınasy» gazeti juma kúngi sanynda «Qazaǵy az sport túrlerine qarakózderimizdi qalaı tartamyz?» degen taqyryppen maqala jarııalady.
***
«Búgin bizdiń respýblıkamyzda Parlament Senatynyń depýtattaryn saılaý ótedi», - dep jazady «Kazahstanskaıa pravda» gazeti búgingi nómirinde jaryq kórgen «Gotovnost №1» degen taqyryptaǵy maqalasynda. Basylymnyń atap ótýinshe, bul kúnderi kúsheıtilgen rejimde jumys istep jatqan Ortalyq saılaý komıssııasynda saılaýdy baıqaýǵa kelgen mıssııa ókilderimen birqatar kezdesý ótken. Kezdesý barysynda OSK tóraǵasy Qýandyq Turǵanqulov Qazaqstannyń saılaýǵa 100 paıyz daıyn ekendigin málimdegen.
