«KazAgroTrade» jobasy StartUP battle baıqaýynda 1 mln teńge jeńip aldy - Pavlodar
ASTANA. QazAqparat - S. Toraıǵyrov atyndaǵy Pavlodar memlekettik ýnıversıtetinde shekaralas yntymaqtastyqtyń «Birlik - Edınstvo. KZ» halyqaralyq jastar forýmy ótti.
Ýnıversıtettiń baspasóz qyzmeti málim etkendeı, forým jumysyna Máskeý, Omby, Novosibir, Tomby, Altaı óńiri, Komı Respýblıkasy jáne Qazaqstan oblystarynyń ókilderi qatysty.
Budan ózge, sharaǵa Ońtústik Koreı, Qytaı, Tájikstan, Qyrǵyzstan, Mońǵolııa, Ózbekstan, Ázirbaıjan elderiniń stýdentteri, jastar uıymdarynyń ókilderi men jas kásipkerler de keldi, dep habarlaıdy pavlodarnews.kz .
Forým barysynda kópshilik nazaryna ýnıversıtet startap akademııasynyń jas kásipkerleriniń jobalar kórmesi usynyldy. Olardyń qatarynda belgili jobalar: «Alau», «Rimmini», «Tafella», sondaı-aq, jańa jobalar qatarynda: «QR-GID» alǵashqy qala boıynsha ınterbelsendi jolsilteýshi, «ITHOUSE» ınnovatsııalyq oqý ortalyǵy, «Lovets snov» táýlik boıǵy ashana, «Samal» beıimdelý ortalyǵy balalarynyń «Preodolenıe» jobasy aıasynda jasaǵan qolóner buıymdary. «HXI ǵasyrdaǵy etnıkaaralyq dıplomatııa: jańa shaqyrtýlar, jańa úrdister» plenarlyq otyrysynda qatysýshylar aldynda Pavlodar oblysy ákiminiń orynbasary Meıram Begentaev sóz sóıledi. Prezıdent Ákimshiligi Qazaqstan halqy Assambleıasy hatshylyǵynyń meńgerýshisi Leonıd Prokopenkonyń aıtýynsha, qarym-qatynasqa qarjydan bólek, Qazaqstandaǵy qýatty ekonomıkalyq aktıv - beıbitshilik pen túsinistik syndy qundylyqtardy da salý qajet. Tel-Avıv ýnıversıtetiniń (Izraıl) bıznes-ınkýbatorynyń dırektory Elena Donets áleýmettik-baǵdarly kásipkerlik týrasynda oı qozǵaǵanda, kásip tek qarajat kózi ǵana emes, ol tehnologııalyq damýǵa óz septigin tıgizip, qoǵamǵa paıda ákelýdi kózdeýi tıis ekenin aıtty. Plehanov atyndaǵy REÝ (Máskeý q.) bıznes-ınkýbatorynyń basshysy Rýslan Mamedovtyń baıandamasy bolashaqtaǵy mamandyqtar týrasynda boldy. Onyń málimdeýinshe, bolashaqta oryn alatyn jasandy ıntellektiniń damýyn eskere otyryp, erteńgi kúni nemen básekeles bolatynymyzdy búgin oılaǵanymyz durys.
Forýmnyń resmı bólimi sońynda S. Toraıǵyrov atyndaǵy PMÝ rektorynyń m.a., ǵylymı jumys jáne ınnovatsııa jónindegi prorektory Nurlan Erjanov «Birlik - Edınstvo. Kz» ótpeli kýbogin Qazaqstan Respýblıkasynyń «Dýstlık» ózbek qaýymdastyǵynyń jastar qanatynyń basshysy Sherzod Pýlatovqa tabystady. Al StartUP battle jobalar baıqaýynda bir mıllıon teńgeni S. Toraıǵyrov atyndaǵy PMÝ-niń magıstranty Álfarabı Uzaq jeńip aldy. - Biz Qazaqstannyń aýyl sharýashylyǵy taýaróndirýshilerin biriktiretin elektrondyq kooperatsııa platformasy bolatyn «KazAgroTrade» jobasyn jasadyq. Klıent saıtta tapsyrys beredi, bul tapsyrys birden óndirýshilerge sms-habarlama retinde jóneltiledi. Onda qajetti taýar, kólemi jáne baılanystar kórsetiledi, - deıdi baıqaý jeńimpazy. Álfarabı jeńip alǵan qarajatty jobanyń tehnıkalyq qamsyzdanýyn jetildirý jumystaryna jumsamaq.
