QazAgrony jekeshelendirý: Fermerler jersiz qalyp qoımaı ma

ASTANA. QazAqparat -  QR Parlament Májilisiniń búgingi otyrysynda jekeshelendirý máselesi qaraldy. Osy oraıda depýtattar «QazAgro» xoldıngin jeke menshikke satýǵa qatysty alańdaýshylyq bildirdi, dep xabarlaıdy QazAqparat tilshisi.

QR Parlament Májilisiniń depýtaty Murat Temirjanovtyń aıtýynsha, búginde fermerler «QazAgrodan» nesıe alǵan kezde aýyl sharýashylyǵy jerlerin kepildikke salyp otyrady. «Qazirdiń ózinde «QazAgronyń» kepildiginde 1,2 mln gektardan astam jer bar. Al uıymnyń jalpy portfeli 237 mlrd teńgeni qurap otyr. Kepildikte turǵan menshiktiń somasy shamamen 130 mlrd teńgeni quraıdy. QazAgro Ulttyq qorǵa 72,5 mlrd teńge qaryz. Bunyń barlyǵyn qaıtarý qajet. Endi, jańa ınvestordyń kelýimen jer jáne taǵy basqa kepildikte turǵan menshikti sonyń qolyna berip qoıamyz ǵoı. Ol ınvestor shetelden kelýi de múmkin» , - deıdi M.Temirjanov. Onyń oıynsha, jańa ınvestor qarjylandyrý sharttaryn ózgertýi ábden múmkin. «Al, eń bastysy, fermerler jersiz qalyp qoımaı ma?», - dep surady depýtat.

«QazAgro» ulttyq basqarýshy xoldıngi» AQ basqarma tóraǵasy Nurlybek Malelovtyń sózine qaraǵanda, qarjy uıymynyń qyzmeti de, talaptary da qala beredi. Bul - jekeshelendirýdiń basty sharty. «Al aqshany qaıtarý máselesine keler bolsaq, jańa ınvestor aýyl sharýashylyǵy ónim óndirýshilerine berilgen nesıeni birden qaıtarýdy talap etpeıdi. Olar qarjyny bekitilgen keste boıynsha tólep otyrady. Sondyqtan alańdaýdyń qajeti joq. Iá, jerdiń biraz bóligi kepildikte tur. Degenmen, ol jerlerdi paıdalaný quqyǵy tek fermerlerge ǵana tıesili. Olar óz mindetterin durys atqaryp, aqshany ýaqytynda tólep tursa, jerdi paıdalaný quqyǵyn eshkim buza almaıdy», - dep atap kórsetti N.Malelov.

Aıta keteıik, otyrys barysynda QR Ulttyq ekonomıka mınıstri Tımýr Súleımenov Turǵyn úı qurylys jınaq bankin jekeshelendirý sharalaryn túsindirdi. Mınıstr atalǵan sharadan keıingi ózgerister men ınvestorǵa qoıylatyn negizgi talaptardy da jarııalady.