«Qazagromarketıngten» keńes surap 3 myń sharýa qońyraý soqqan
Aǵymdaǵy jyldyń qyrkúıek-qazan aılarynda qońyraýlar sany kúrt artqan, naqtyraq aıtsaq, qyrkúıek aıynda ortalyqqa 423, qazan aıynda 725 adam habarlasqan. Qońyraýlar sanynyń artýy «Agrarlyq nesıe korporatsııasy» AQ-nyń jylqy («Qulan») jáne qoı («Altyn asyq») sharýashylyqtary salasyndaǵy jańa nesıeleý baǵdarlamalaryn iske asyryp, olardy buqaralyq aqparat quraldary arqyly jarnamalaýyna baılanysty oryn alyp otyr.
Jyl basynan beri habarlasqandardy qyzyqtyrǵan taqyryptar ishinde eń basty oryn ádettegideı «QazAgro» holdıngisiniń enshiles kompanııalary - «Agrarlyq nesıe korporatsııasy» AQ, «QazAgroQarjy» AQ, «Aýyl sharýashylyǵyn qarjylaı qoldaý qory» AQ arqyly nesıe alýǵa tıesili. Qyrkúıek aıynda bul taqyryp tóńireginde jasalǵan qońyraýlar sany 60%-dy, qazan aıynda 80%-dy quraǵan.
Onyń ishinde sharýalardy neǵurlym qyzyqtyrǵan «Qulan» jáne «Altyn asyq» baǵdarlamalary bolyp tabylady. Baǵdarlama sharttaryna sáıkes Agrarlyq nesıe korporatsııasy óziniń oblys ortalyqtaryndaǵy ókildikteri men aýdandardaǵy nesıe seriktestikteri arqyly qoı men jylqy malyn, tehnıka, qural-jabdyq, aınalym qarajatyn satyp alý men maldy ósirýge qajetti qurylystardy salýǵa 4%-dan 9%-ǵa (sýbsıdııalaýdy eskere otyryp) deıingi paıyzdyq stavkamen jeńildetilgen nesıe bóledi. Baǵdarlamanyń artyqshylyǵy - nesıeni isin endi bastaǵaly otyrǵan sharýalar ala alady. Shart boıynsha qaryzgerdiń satyp alynǵan mal qunynyń 30%-nan kem emes mólsherde óz qarajaty bolýy tıis.
«Qazagromarketıng» AQ baılanys ortalyǵynyń qyzmetkerleri sharýany qyzyqtyrǵan baǵyt boıynsha nesıeleý sharttaryn túsindirip, naqty qaı uıymǵa habaralasý qajet ekendigin aıtady, uıymnyń telefondary men mekenjaıyn habarlaıdy.
Ótken qazan aıynda qońyraýlardyń kóbisi Ońtústik Qazaqstan (31%), Almaty (13%), Jambyl (10%) jáne Shyǵys Qazaqstan (7%) oblystarynan kelip túsken. Qalǵan oblystardan qabyldanǵan qońyraýlar sany 1-den 5%-ǵa deıingi mólsherdi quraǵan.
Qazan aıynda tirkelgen qońyraýlardyń 63% qazaq tilinde jasalǵan.
Baılanys ortalyǵyna habarlasý tegin: Qazaqstannyń kez kelgen aımaǵynan statsıonarlyq jáne uıaly telefonnan aqysyz qońyraý shalýǵa bolady.
Baılanys ortalyǵynyń qyzmeti Astana ýaqyty boıynsha jumys kúnderi saǵat 9.00-den 18.30-ǵa deıin qoljetimdi (úzilis 13.00-den 14.30-ǵa deıin). Jumys ýaqytynan tysqary mezgilde habarlasqandardyń qoıǵan saýaldary taspaǵa jazylyp, keıinnen operatorlardyń nazaryna ilinedi.
«Qazagromarketıng» AQ-nyń baılanys ortalyǵy 8 800 080 70 80 nómiri boıynsha qyzmet kórsetedi.
