«Qazagromarketıng» AQ AÓK sýbektilerin qarjylyq saýyqtyrý boıynsha ótinimder qabyldaýdy bastady

ASTANA. QazAqparat - «Qazagromarketıng» AQ «Qazaqstan Respýblıkasynda agroónerkásiptik keshendi damytý jónindegi 2013-2020 jyldarǵa arnalǵan «Agrobıznes-2020» baǵdarlamasyn iske asyrý aıasynda qarjy ınstıtýttarynan agroónerkásiptik keshen (AÓK) sýbektilerin qarjylyq saýyqtyrý boıynsha ótinimder qabyldaýdy bastady, dep habarlaıdy «Qazagromarketıng» AQ-nyń baspasóz qyzmetinen.

Qarjylyq saýyqtyrýǵa 2014 jyldyń 1 qańtary kúnine ekinshi deńgeıli bankterdiń jáne lızıngtik kompanııalardyń nemese ózge de uıymdardyń aldynda qaryzdary bar agroónerkásiptik keshen sýbektileri qatysa alady.

Sýbektilerdiń qaryzy 9 jylǵa deıingi merzimge qaıta qurylymdalýy (qaıta qarjylandyrylýy) jáne qaryz boıynsha jyldyq syıaqy mólsherlemesi teńgede 7%-ǵa jáne sheteldik valıýtada 5%-ǵa tómendetilýi múmkin. Qarjylyq saýyqtyrýǵa qatysýǵa nıet bildirgen qaryzgerler qaryz alǵan ekinshi deńgeıli bankterge, lızıngtik kompanııalarǵa nemese ózge uıymdarǵa ótinim berýi tıis. Qarjylyq saýyqtyrý Qazaqstan Respýblıkasy aýyl sharýashylyǵy mınıstriniń 2015 jylǵy 9 sáýirdegi №9-1/320 «Agroónerkásiptik keshen sýbektilerin qarjylyq saýyqtyrý jónindegi baǵyt sheńberinde kredıttik jáne lızıngtik mindettemeler boıynsha paıyzdyq mólsherlemeni sýbsıdııalaý qaǵıdalaryn bekitý týraly» buıryǵy negizinde júzege asyrylady.