«QazAgroQarjy» reseılik bankten 1,8 mlrd rýbl qaryz alady

ASTANA. QazAqparat - «QazAgroQarjy» AQ 1,8 mlrd. reseılik rýbl somasynda qaryz tartý týraly reseılik «Sıtıbank» aktsıonerlik qoǵamymen eki jaqty kredıttik kelisimge qol qoıdy. Bul týraly kompanııanyń baspasóz qyzmetinen habarlandy.

Atalǵan qarajat qazaqstandyq agrarshylardyń qajettilikterine jumsalatyny kózdelip otyr. Sonyń ishinde, Reseıde shyǵarylatyn aýyl sharýashylyǵy tehnıkasyn satyp alynyp, keıinnen ony qazaqstandyq sharýalarǵa lızıng arqyly ótkizý de qarastyrylǵan.
«Qazirgi ekonomıkalyq jaǵdaıda ulttyq valıýta - teńgemen qorlandyrý baǵyty birshama kúrdelileý bolyp otyr. Sondyqtan da, Reseı rýblimen qarjylandyrý tartý, valıýta naryǵynda turaqsyz jaǵdaı týyndaǵan jaǵdaıda, valıýta táýekelin barynsha azaıtýǵa múmkindik beretin balama qarjylandyrý kózi bolyp tabylady. Óıtkeni, reseılik rýbl baǵamynyń korrelıatsııasy qazaqstandyq teńgemen qatynasynda anaǵurlym joǵary», - delingen baspasóz baıanynda.
Eske sala keteıik, «QazAgroQarjy» AQ - ınvestıtsııalyq jobalardy qarjylandyrý jáne lızıngke aýyl sharýashylyǵy tehnıkalary men tehnologııalyq jabdyqtardy jetkizý mindetimen aınalysady.