«QazAgroQarjy» AQ syıaqy stavkalaryn 7 paıyzǵa tómendetý úshin ótinimder qabyldaı bastady
ASTANA. QazAqparat - «QazAgroQarjy» AQ kredıt/lızıng sharttary boıynsha syıaqy mólsherlemelerin sýbsıdııalaý úshin klıentterden ótinimder men qujattar qabyldaı bastady. Bul týraly kompanııanyń baspasóz qyzmetinen habarlandy.
«Baǵdarlama talaptaryna sáıkes, aınalym qarajattaryn tolyqtyrýǵa jáne negizgi quraldar satyp alýǵa, qurylysqa arnalǵan kredıtter boıynsha, sondaı-aq tehnologııalyq jabdyqtar men aýyl sharýashylyǵy tehnıkasyn satyp alýǵa arnalǵan lızıng boıynsha syıaqy mólsherlemeleri jyldyq 7 paıyzǵa tómendeıdi. Sonymen qatar, mal sharýashylyǵy jáne jem-shóp sharýashylyǵy salalarynda tehnıka men jabdyqtar satyp alýǵa jasalǵan sharttar boıynsha paıyzdyq mólsherleme 10 paıyzǵa tómendetiledi.
Bul rette qaryz alýshyda keminde 50 mal basy nemese jem-shóp daqyldaryn ósirý úshin paıdalanatyn jer telimderiniń bolýyn rastaıtyn qujattar qajet bolady. Osynyń ózi jem-shóp óndirisin, jalpy elimizdiń agrarlyq sektoryn damytý maqsatyndaǵy memlekettiń eleýli qoldaýy bolyp tabylady», delingen baspasóz baıanynda. Aıta keteıik, sýbsıdııalar Qazaqstan Respýblıkasynda agroónerkásiptik keshendi damytýdyń 2013-2020 jyldarǵa arnalǵan «Agrobıznes-2020» baǵdarlamasy sheńberinde beriledi. Sýbsıdııa berýdiń tolyǵyraq talaptary, tapsyrylatyn qujattar, ótinimderdi qabyldaý jáne sheshim qabyldaý tártipteri «Kredıtter, sondaı-aq tehnologııalyq jabdyqtyń jáne aýyl sharýashylyǵy tehnıkasynyń lızıngi boıynsha syıaqy mólsherlemelerin sýbsıdııalaý qaǵıdalaryn bekitý týraly» 2014 jylǵy 25 qarashadaǵy №9-1/613 QR Aýyl sharýashylyǵy mınıstriniń buıryǵymen bekitilgen.
