«QazAgroQarjy» AQ alaıaqtardyń arbaýyna túsip qalmaýdy eskertedi
«Sońǵy ýaqytta ózderin «QazAgroQarjy» AQ qyzmetkerleri retinde tanystyryp, qaryz alý úshin qujattardy resimdeýge kómekterin usynatyn úshinshi tulǵalardyń alaıaqtyq is-áreketteri tirkelgendigin nazarlaryńyzǵa jetkizemiz. Sizderden alaıaqtardyń qasaqana jasaǵan arandatýshylyq áreketterine ermeýlerińizdi suraımyz!
«QazAgroQarjy» AQ qujattardy jınaý, qabyldaý jáne óńdeý jumystaryn tek oblys ortalyqtaryndaǵy jáne Qazaqstannyń iri qalalaryndaǵy óziniń resmı ókildikterinde - «QazAgroQarjy» AQ fılıaldarynda, sondaı-aq Astana qalasyndaǵy ortalyq apparatynda ǵana júrgizetinin resmı túrde málimdeıdi. Sizderden qyraǵylyq kórsetip, alaıaqtardyń jeteginde ketpeı, saq bolýlaryńyzdy suraımyz!», delingen habarlamada.
Barlyq suraqtar boıynsha «QazAgroQarjy» AQ Qazaqstan boıynsha fılıaldaryna, sondaı-aq bizdiń www.kaf.kz. resmı saıtymyzda kórsetilgen telefon nómirlerine qońyraý soǵýǵa bolady.
«QazAgroQarjy» AQ 1999 jyly QR Úkimetiniń qaýlysymen qurylǵan. Negizgi maqsaty - aýyl sharýashylyǵy taýar óndirýshileriniń qarjy qarajattaryna, sondaı-aq lızıng negizinde aýyl sharýashylyǵy tehnıkalaryna jáne tehnologııalyq jabdyqtarǵa degen qoljetimdiligin qamtamasyz etý arqyly respýblıkanyń agrarlyq sektoryna qoldaý jasaý.
