«QazAgroQarjy» 1 qyrkúıekke deıin Qazaqstanǵa keminde 760 kombaın ákelý múmkindigin qarastyrýda
ASTANA. 25 maýsym. QazAqparat - Qazaqstandyq iri jer ıelenýshiler 2012 jyldyń egin jınaý naýqanyna qaraı astyq jınaıtyn tehnıkalardy ońaılatylǵan shema boıynsha satyp alatyn bolady.
«QazAgroQarjy» AQ sharýalardyń aldaǵy egin jınaý naýqanyna qajetti kombaındardy satyp alý múmkindigin edáýir ulǵaıtatyn ońaılatylǵan qarjylandyrý talaptaryn bekitti. Kompanııa «Astyq-2012» degen ataýmen jańa lızıngtik ónim usynyp otyr, onda birqatar sharalar kózdelgen, onyń ishinde - avanstyq tólem somasyn tómendetý jáne sharýalar satyp alatyn tehnıka úshin tólemaqylar boıynsha merzimin uzartý. Bul sharalar birinshi kezekte jáne kóbinese usaq sharýa qojalyqtaryn qoldaýǵa baǵyttalǵan, dep habarlady «QazAgroQarjy» AQ baspasóz hatshysy Rınat Tasbolatov.
Kópshilikke málim, ázirshe ósimdik sharýashylyǵynda mamandanatyn aýyldyqtardyń báriniń de egis jumystaryn júrgizýge qajetti tehnıkalyq park satyp alyp, ony ustaýǵa múmkindikteri joq. Áńgime maýsymdyq jumys qyzǵan kezde barlyq agrotehnıkalyq merzimderdi buzyp, sonyń nátıjesinde keıde shyǵynǵa ushyrap, jalǵa alynatyn tehnıkalardy jumyldyrýǵa májbúr bolatyn kishigirim sharýa jáne fermer sharýashylyqtary jóninde bolyp otyr.
«Astyq-2012» baǵdarlamasy boıynsha jańa jeńildikti talaptarmen kelesi sharalar kózdelgen:
- lızıng zatynyń (kombaınnyń) jalpy qunynan 10% kóleminde birinshi lızıngtik (avanstyq) tólem;
- tehnıkany lızıngke birinshi lızıngtik tólem tólengenge deıin tabystaý múmkindigi;
- aǵymdaǵy jyldyń ónimi alynǵanǵa deıin (qarasha aıyna deıin, ıaǵnı sharýashylyqtar jumystaryn aıaqtap, ósirgen ónimderin túgel jınap alǵan kezeńge deıin) birinshi lızıngtik tólemdi tóleý boıynsha merzimin uzartý.
Jańa baǵdarlamaǵa sáıkes lızıngke anaǵurlym arzan jáne qyzmet kórsetýde kóp shyǵyndy qajet etpeıtin reseılik jáne qazaqstandyq óndiristerdiń astyq jınaıtyn tehnıkalary - «Nıva», «Enıseı», «Essil», «Vektor» kombaındary usynylatyn bolady. Arzan baǵasyn eskere otyryp (orta eseppen 10 mln. teńgeden bastalady) atalmysh kombaındar suranyspen qoldanylady jáne jyl saıyn usaq jáne ortasha aýyl sharýashylyǵy qurylymdarymen satylyp alynady. Mysalǵa, «QazAgroQarjy» júrgizgen monıtorıng derekterine sáıkes, tek qana sońǵy eki jyl ishinde aýyldyqtar kompanııadan 263 «Essil», 206 «Enıseı» jáne 162 «Vektor» kombaındaryn satyp aldy.
Búgingi tańda «QazAgroQarjy» óndiristik qýattary 1 qyrkúıekke deıin Qazaqstanǵa keminde 760 birlik kombaın jetkizýge múmkindik beretin birqatar jetkizýshilermen jáne óndirýshi zaýyttarmen kelissózder júrgizdi («AgromashHoldıng» AQ, «Chetra-Vostok» JShQ, «Kombaınovyı zavod Rostselmash» JShQ).
2000-2012 jyldar ishinde «QazAgroQarjy» AQ respýblıkanyń AÓK-ne 240 mlrd. teńgeden astam qarjy ınvestıtsııalady. Osy ýaqyt ishinde lızıngtik kompanııa jalpy somasy 167,7 mlrd. teńgege 20 myńǵa jýyq birlik ár túrli aýyl sharýashylyǵy tehnıkalary men jabdyqtar satyp alýǵa qarjylandyrdy.
«QazAgroQarjy» AQ - 1999 jyly QR Úkimetiniń qaýlysymen qurylǵan kompanııa. Negizgi maqsaty - aýyl sharýashylyǵy taýar óndirýshileriniń qarjy qarajattaryna, sonymen qatar lızıng negizinde aýyl sharýashylyǵy tehnıkalary men tehnologııalyq jabdyqtarǵa degen qol jetimdiligin qamtamasyz etý arqyly respýblıkanyń agrarlyq sektoryn damytýǵa qoldaý jasaý.
«QazAgro» ulttyq basqarýshy holdıngi» AQ quramyna enedi.
