«QazAgroQarjy» óz lızıng baǵdarlamasyn iske qosty
ASTANA. KAZINFORM — «Báıterek» ulttyq holdınginiń kompanııalar tobyna kiretin «QazAgroQarjy» AQ óz qarajaty esebinen jańa lızıng baǵdarlamasyn naryqqa shyǵardy, dep habarlaıdy AShM.
Baǵdarlama qajettilikteri qoldanystaǵy jeńildetilgen baǵdarlamalardan asyp túsetin aýyl sharýashylyǵy óndirýshilerine baǵyttalǵan. Jańa ónim sharýalarǵa qazir qoljetimdi.
Baǵdarlama «Báıterek» Holdınginiń enshiles kompanııalardy qarjylandyrý baǵdarlamalary boıynsha mólsherlemelerdi birizdendirý jónindegi jańa strategııasynyń sheńberinde ázirlendi jáne jyldyq 12,6% mólsherlemeni, 10 jylǵa deıingi lızıng merzimin jáne 15%-dan bastalatyn avansty kózdeıdi. Qarjylandyrý tek kompanııanyń menshikti qarajaty esebinen júzege asyrylady, bul ónimdi aǵymdaǵy suranys jaǵdaıynda uzaq merzimdi ınvestıtsııalyq resýrstarǵa óte ıkemdi etpek.
— Jańa baǵdarlama — naryq suranysyna bizdiń strategııalyq jaýabymyz. Jeńildetilgen mehanızmderden qalys qalǵan baǵyttar men tehnıka túrleri jeterlik. Olardy qarjylandyrýǵa da qajettilik saqtalyp otyr. Óz resýrstarymyzdy paıdalana otyryp, biz memlekettik baǵdarlamalardan tys qalǵandar úshin qosymsha múmkindikterge jol ashyp otyrmyz. Bul jeńildetilgen sheshimderge balama emes, olardy logıkalyq jáne der kezinde tolyqtyrý, — dep atap ótti «QazAgroQarjy» AQ basqarma tóraǵasy Aıdar Prashev.
Osylaısha, baǵdarlama sheńberinde 2025 jyly AÓK sýbektileriniń keń aýqymyn qamtı otyra, 20 mlrd teńge shamasynda qarjylandyrý josparlanyp otyr.
Jańa ónimmen qatar, «QazAgroQarjy» otandyq tehnıkany jyldyq 5%-ben lızıngke berýdiń flagmandyq jeńildetilgen baǵdarlamasyn iske asyrýdy jalǵastyryp jatyr. 2025 jyly oǵan 200 mlrd teńge bólindi, qazirdiń ózinde 76 mlrd teńge somasyna 4 myńnan astam tehnıka satyp alý qarjylandyryldy. Sondaı-aq, «Qazaqstanda jasalǵan», 6%-ben «Jeńildetilgen lızıng», «Óz jem-shóbimiz» baǵdarlamalary da qoldanysta, osy baǵdarlamalar boıynsha qarjylandyrý 18,5 mlrd teńge kóleminde dep boljanǵan.
Bul quraldardyń barlyǵy aýyl sharýashylyǵyn damytýǵa, azyq-túlik qaýipsizdigin nyǵaıtýǵa jáne otandyq mashına jasaýdy qoldaýǵa baǵyttalǵan.
Budan buryn sharýalardy jeńildetilgen lızıngti qarjylandyrý kólemi 450 mlrd teńgege ulǵaıatyny aıtyldy.