«QazAgroInnovatsııa» bıyl 3 myń taýar óndirýshini oqytty
ASTANA. 30 qarasha. QazAqparat - 2012 jyldyń basynan «QazAgroInnovatsııa» aktsıonerlik qoǵamyndaǵy Bilim taratý ortalyqtarynda 3000 aýyl sharýashylyǵy taýaryn óndirýshi oqytyldy. Bul týraly «QazAgroInnovatsııa» aktsıonerlik qoǵamynda 2012 jylǵy qyzmet qorytyndylary boıynsha Bilim taratý ortalyqtarynyń esepterin tyńdaý barysynda málim boldy. Atalmysh keńeske Qazaqstan Respýblıkasy Aýyl sharýashylyǵy mınıstrliginiń, «QazAgroInnovatsııa» AQ jáne Nemis Agrarlyq Ortalyǵynyń ókilderi qatysqan bolatyn.
Usynylǵan esepke qaraǵanda, 2012 jyly barlyǵy 96 oqytý semınary ótkizilip, 3000-nan astam agroónerkásip sýbektileri oqytylǵan. Semınarlardyń 55 paıyzy ósimdik sharýashylyǵy, 33 paıyzy mal sharýashylyǵy, 7 paıyzy agrarlyq menedjment, 5 paıyzy balyq sharýashylyǵy boıynsha júzege asty. Budan bólek, resýrs únemdeıtin tehnologııalar, maıly jáne burshaq daqyldaryn ósirý, sút jáne et baǵytyndaǵy mal sharýashylyǵy boıynsha semınarlarǵa Argentınanyń, Avstralııanyń, Ýkraınanyń, Germanııanyń jáne Reseıdiń lektorlary qatysty. 1964 ret qashyqtan konsýltatsııa berý jáne sharýashylyqtarǵa isssaparmen baryp 2421 ret tikeleı konsýltatsııa berý júzege asyryldy.
Eske sala ketsek, «QazAgroInnovatsııa» AQ qyzmetiniń negizgi baǵyttarynyń biri kásipkerlik sektorǵa tıimdiligi joǵary ǵylymı ázirlemelerdi engizý bolyp tabylady. Osy oraıda, Aýyl sharýashylyǵy mınıstrliginiń qoldaýymen 2009 jyldan bastap Qazaqstannyń agrarlyq ónerkásip kesheni salasynda bilim taratý júıesin damytý boıynsha joba iske asyryla bastaǵan bolatyn. Qazirgi ýaqytta «QazAgroInnovatsııa» AQ ǵylymı-zertteý ınstıtýttary men tájirıbelik-eksperımenttik uıymdary bazasynda 10 bilim taratý ortalyǵy jumys isteıdi. Sonymen birge, «Soltústik Qazaqstan aýyl sharýashylyǵy ǴZI» JShS bazasynda halyqaralyq Nemis Agrarlyq Ortalyǵy qurylǵan.
«2013-2015 jyldarda Jambyl, Batys Qazaqstan, Pavlodar, Atyraý, Aqtóbe jáne Aqmola oblystarynda taǵy da 6 Bilim taratý ortalyqtaryn ashý josparlanyp otyr. Osylaısha, 2015 jylǵa deıin 16 Bilim taratý ortalyqtary qurylyp, bunymen Qazaqstannyń búkil óńirleri qamtylmaq», - delingen baspasóz aıǵaǵynda.
