«QazAgroFınas» AQ aǵymdaǵy jyly agroónerkásip keshenderin qarjylandyrý somasyn arttyrýdy josparlap otyr
ASTANA. Qańtardyń 2-si. QazAqparat - «QazAgroFınans» AQ aǵymdaǵy jyly agroónerkásip keshenderin qarjylandyrý somasyn arttyrýdy josparlap otyr. Bul aqparatty atalǵan mekemeniń baspasóz qyzmeti taratyp otyr.
Onda «aýyl sharýashylyǵy tehnıkalary men arnaıy tehnıkalardy satyp alýdy qarjylandyrýmen qatar óńdeýshi salany da qarjylandyrý jalǵasady. Sonymen qatar kompanııa Qazaqstanǵa agrarlyq ǵylymnyń jańa jetistikteri men eń úzdik qazirgi zamanǵy tehnologııany tartýdy basty nazarda ustaıdy», - delingen.
Sondaı-aq osy jyly «QazAgroFınans» 6 baǵyt boıynsha Ulttyq qor qarjysynan ınvestıtsııalyq jobalardy qarjylandyrýdy jalǵastyrady. Olar - aýyl sharýashylyǵy tehnıkalaryn qurastyrý boıynsha óndiris uıymdastyrý, jumys istep turǵan taýarly-sút fermalary, qus fabrıkalary, jylyjaı sharýashylyqtary, jemis-jıdek qoımalary jelisin qurý jáne damytý, tamshylatyp sýarý arqyly jemis-kókónisti daqyldar óndiristeri.
