«QazAgrodan» 700 mln teńge urlaǵandar sottaldy

ASTANA. QazAqparat - «QazAgro» holdınginen iri somadaǵy qarajattyń urlanýyna qatysty jeke jáne kvazımemlekettik kompanııalardyń laýazymdy tulǵalary sottaldy, dep habarlaıdy QazAqparat tilshisi QR Qarjy mınıstrligi Memlekettik kirister komıtetiniń baspasóz qyzmetine silteme jasap.

«Astana qalasy boıynsha Memlekettik kirister departamentiniń ekonomıkalyq tergeý qyzmeti «Astana Bottlers» JShS basshylyǵyndaǵy - bas dırektor M.J. Esirkepov jáne atqarýshy dırektor Sh.E. Teshabaev, sonymen birge «QazAgroónim» AQ basqarma tóraǵasynyń orynbasary B.M.Kúzembaevqa qatysty qylmystyq isti tergeý jumystary aıaqtaldy. Atalǵan is «QazAgro» Ulttyq basqarýshy holdınginiń bıýdjet qarajatynyń 700 mln teńgesin jymqyrý jáne jumsaý, qylmystyq jolmen tabylǵan aqshany zańdastyrý faktisi retinde tirkelgen», - delingen baspasóz habarlamasynda.

Málim bolǵandaı, 2014 jyly «Astana Bottlers» JShS  «QazAgro» memlekettik kompanııasynyń 700 mln teńge kólemindegi qarajatyna «Janym» saýda markasymen ýltrapasterlengen sút shyǵaratyn óndiristi iske qosýy tıis bolǵan. Alaıda «QazAgroónim» AQ-nyń laýazymdy adamdary men «Astana Bottlers» JShS basshylyǵyndaǵy M.J.Esirkepov jáne Sh.E.Tashebaev is boıynsha B.M.Kúzembaevpen sóz baılasyp, bul aqshany qaltalaryna basqan.

Osylaısha, memlekettiń aqshasy jumsalǵan zaýyt birde-bir lıtr sút shyǵarmaǵan. Jymqyrylǵan aqsha aqyry avtokólik satyp alý, Eýropaǵa qydyrý, sonymen birge Esirkepovtyń jeke qaryzdaryn jabýǵa jumsalǵan.

Tergeý barysynda tutqyndalǵan adamdardyń 970 mln teńgelik jeke múlikteri tárkilengen.

Sot úkimi boıynsha M.J. Esirkepov 8 jylǵa, al Sh.E. Teshabaev pen B.M. Kúzembaev 7 jylǵa bas bostandyqtarynan aıyrylǵan. Olar jazalaryn qylmystyq-atqarý júıesiniń qaýipsizdigi ortasha mekemesinde óteıtin bolady.