«QazAgro» UBH» AQ basqarma tóraǵasy taǵaıyndaldy

ASTANA. QazAqparat - 2015 jylǵy 28 mamyrdaǵy jalǵyz aktsıonerdiń sheshimimen jáne Aýyl sharýashylyǵy mınıstriniń buıryǵymen «QazAgro» Ulttyq basqarýshy holdıngi» AQ basqarma tóraǵasy bolyp Málelov Nurlybek Tólebaıuly taǵaıyndaldy. Bul týraly «QazAgro» UBH» AQ baspasóz qyzmetinen habarlady.

Holdıng ujymyna jańa basshyny tanystyrý barysynda Aýyl sharýashylyǵy mınıstri Asyljan Mamytbekov Málelov Nurlybek Tólebaıulynyń qarjylyq ınstıtýttarda, sonymen qatar «QazAgro» Holdınginiń qurylymdarynda jumys isteýdiń úlken tájirıbıesi bar ekendigin atap ótti. Mınıstrdiń sózine sáıkes búgingi kúni Holdıng pen onyń jańa basshysynyń aldynda úlken tapsyrmalar tur. Onyń ishinde - 2011-2020 jyldarǵa «QazAgro» UBH» AQ damý Strategııasyna enshiles kompanııalardyń qyzmetin ońtaılandyrý men onyń oryndalýyn baǵalaýdy eskere otyryp ózgerister engizý.

Málelov Nurlybek Tólebaıuly 1971 jyldyń 17 qyrkúıeginde Torǵaı oblysynda dúnıege kelgen. Qaraǵandy memlkettik ýnıversıteti ekonomıka fakýltetinde bilim alǵan.

Eńbek qyzmetin 1995 jyly «Turan Bankinde» bastaǵan. Ár jyldarda «ATF Bank» AAQ, «ASTANA CAPITAL InvestmentGroup» JShS basshy qyzmetterinde bolǵan.

2009 jyldan beri «QazAgro» Holdıngi júıesinde qyzmet etýde: «QazAgro» Ulttyq basqarýshy holdıngi» AQ Basqarýshy dırektory, «QazAgroQarjy» AQ basqarma tóraǵasy, «Agrarlyq nesıe korporatsııasy» AQ basqarma tóraǵasy.

2015 jyldyń mamyr aıynan «QazAgro» Ulttyq basqarýshy holdıngi» AQ basqarma tóraǵasy qyzmetine taǵaıyndaldy.

«Eren eńbegi úshin» medalimen marapattalǵan.