«QazAgro» men «Báıterek» bıýdjet pen bank arasyndaǵy paıdasyz deldalǵa aınaldy - QR Prezıdenti
«Jekeshelendirý ekonomıkalyq básekelestikke yntalandyrady. Búginde turaqty ekonomıkalyq ósimge jetý úshin ishki resýrstardy barynsha tıimdi paıdalanǵan durys. Bul úshin eki tıimdi quraldy paıdalanýymyz kerek. Birinshisi, jappaı jekeshelendirý quraly, ekinshisi, básekelestikti keńeıtý tásili. Jalpy, búgin ekonomıkanyń ósýine ne kedergi bolyp otyr? Eń birinshi kedergi - óte úlken memlekettik sektor. Búginde, Qazaqstannyń 7 myńnan asa kásiporny memlekettik sektorǵa tıesili. Olardyń paıdasy bar ma, joq pa, bári bir... «Samuryq-Qazynanyń» holdıngteri, «QazAgro» holdıngi ónerkásip pen aýyl sharýashylyǵynyń orasan zor aktıvterin tıimsiz baqylaýda ustap otyr. «Samuryq-Qazyna» qorynyń aktıvteri jalpy ishki ónimniń 40 paıyzyn quraıdy. Onyń ústine, qordyń 500-den asa enshiles kásiporyndary bar. Ózine enshiles uıymdar ashyp qoımaı, sol kompanııalardyń ishinen taǵy da enshiles uıymdar ashqan. «QazAgro» men «Báıterek» holdıngteri bıýdjet pen bank arasyndaǵy tıimsiz deldalǵa aınalyp ketken. Osynyń barlyǵy shaǵyn kásiporyndar men enshiles uıymdardyń bıýdjet qarjysyn ońdy-soldy jumsaýyna soqtyrdy. Taıaqtyń bir ushy ınvestıtsııalar men jańa bastamalarǵa tıip, olardy naryqtan shettetip otyr»,-dedi Elbasy.
Aıta keteıik, Memleket basshysy búgin Úkimetke memlekettik menshiktegi barlyq uıymdardy, sonyń ishinde «Samuryq-Qazyna», «Báıterek», «QazAgro» holdıngteriniń barlyq uıymdaryn qamtıtyn jańa jekeshelendirý baǵdarlamasyn ázirleýdi tapsyrdy.
