«QazAgro» kóktemgi egis jumystaryn qarjylandyrýǵa ekinshi deńgeıli bankterden ótinimder qabyldaı bastady
ASTANA. QazAqparat - «QazAgro» Ulttyq basqarýshy holdıngi 2016 jylǵy kóktemgi egis jáne astyq jınaý jumystaryn júrgizýge respýblıkanyń aýylsharýashylyq taýar óndirýshilerin qarjylandyrý maqsatynda ekinshi deńgeıli bankterden ótinimderdi qabyldaýdy bastady. Bul týraly holdıngtiń baspasóz qyzmetinen habarlandy.
«Ótinimderdi qabyldaý habarlandyrýdy jarııalaǵan kúnnen bastap 30 kúntizbelik kún aǵymynda júzege asyrylady. Bıýdjettik nesıeni alý suraqtary boıynsha «QazAgro» Ulttyq holdınginiń Investıtsııalyq jobalar jáne nesıelik ádisnama departamentine habarlasý kerek», delingen baspasóz baıanynda.
Eske salaıyq, agroóndiristik keshen sýbektilerin qoldaý boıynsha sharalardy júrgizýge «QazAgro» Ulttyq basqarýshy holdıngine 60 mlrd. teńge kóleminde bıýdjettik nesıe bólindi. Al 2015 jyly egin jumystaryn qoldaýǵa ekinshi deńgeıli bankterge 35,1 mlrd. teńge kóleminde qarajat bólingen. Olardyń ıgerilýi men qaıtarylýy 100 paıyzdy qurady.
«QazAgro» ulttyq basqarýshy holdıngi» AQ onyń quramyna kiretin kompanııalardyń ınvestıtsııalyq aktıvterin tıimdi basqarýdy qamtamasyz etý arqyly Qazaqstannyń agroónerkásiptik keshenin damytý jónindegi memlekettik saıasatty júzege asyrady. Holdıngtiń quramyna: «Azyq-túlik kelisim shart korporatsııasy» ulttyq kompanııasy» AQ, «QazAgroQarjy» AQ, «Agrarlyq nesıe korporatsııasy» AQ, «Aýylsharýashylyǵyn qarjylaı qoldaý qory» AQ, «QazAgroÓnim» AQ, «QazAgroMarketıng» AQ, «QazAgroKepil» AQ kiredi.
