«Kazagro/Kazfarm-2022» kórmesine álemniń 20-dan astam eli qatysady
Kórmeni uıymdastyrýshy ExpoGroup kompanııasynyń dırektory Sholpan Qojabaevanyń aıtýyna qaraǵanda, sharaǵa álemniń 20-dan astam elinen ókilder qatysady.
«Ortalyq Azııa aýmaǵyndaǵy eń úlken kórmelerdiń biri bolaıyn dep tur. Bizdiń ExpoGroup kompanııasy Qyrǵyzstan, Ózbekstan elderinde de kórmeler uıymdastyryp júr. Solarmen salystyryp, bul kórmeni aımaqtaǵy eń iri kórmelerdiń biri dep aýyz toltyryp aıtýǵa bolady.
Kórme aýmaǵy 20 000 sharshy metrden asady. Kórme eki baǵytta ótedi. Birinshi «Kazagro» baǵyty boıynsha ósimdik sharýashylyǵyna tuqymnan bastap unǵa deıingi búkil tsıkl kórsetiledi. Osy saladaǵy búkil suraqtarǵa osy kórmeden jaýap tabýǵa bolady», - dedi ol ortalyq kommýnıkatsııalar qyzmetinde ótken brıfıngide.
Onyń aıtýynsha, kórmeniń ekinshi baǵytyn uıymdastyrýǵa kóp kúsh jumsalyp jatyr.
«Ekinshi «Kazfarm» baǵyty boıynsha mal sharýashylyǵyna arnalady. Bul jyl saıyn ótip keledi. Ony uıymdastyrýdyń óz qıyndyqtary bar. Sebebi tiri eksponattar ákelý ońaı emes. Sebebi sharýalar úshin óristegi nemese qoradaǵy malyn Astanaǵa ákep, qaıtadan áketý mashaqatty protses. Bul baǵyt jasandy uryqtandyrýdan bastap, dastarhandaǵy steıkke deıingi aralyqtaǵy protsesterdiń bári kórmede pash etiledi», - dedi Sholpan Qojabaeva.