«QazAgro» holdınginiń jıyntyq nesıe qorjyny 800 mlrd. teńgeni quraıdy

ASTANA. QazAqparat - «QazAgro» holdınginiń jıyntyq nesıe qorjyny shamamen 800 mlrd. teńgeni quraıdy. Bul týraly búgin Ortalyq kommýnıkatsııalar qyzmetindegi baspasóz máslıhatynda «QazAgro» ulttyq basqarýshy holdıngi» AQ basqarma tóraǵasy Nurlybek Malelov málim etti.

«Fermerlerdiń qarjylandyrýǵa qol jetimdiligin qamtamasyz etý bóliginde, qazirgi ýaqytta Holdıngtiń jıyntyq nesıe qorjyny shamamen 800 mlrd. teńgeni quraıtynyn aıta ketý qajet. Bul elimizdegi barlyq bank júıesiniń aýylsharýashylyq sektoryn qarjylandyrý kóleminen artyq. Holdıngpen túrli salalyq baǵyttar men agrobıznestiń qajettiligine beıimdelgen 40-tan astam nesıe ónimderi iske asyrylýda. Qaryz alýshylardyń jalpy sany 47 myń aýylsharýashylyq taýaryn óndirýshilerden asady. Nesıeleý kólemindegi shaǵyn jáne orta bıznestiń (ShOB) úlesi 87 paıyzdy quraıdy. Qarjylandyrýmen elimizdiń barlyq aýdandary qamtyldy», - dedi N. Malelov.

Onyń sózine qaraǵanda, sońǵy bes jyl ishinde Holdıng kompanııasy tobynyń agrarlyq sektordy qarjylandyrý kólemi 60 paıyzǵa ósti. Osy rette 24 myńnan astam jumys oryndary quryldy. Holdıngtiń qarjylandyrýy esebinen 90 myńnan astam jumys oryndary qamtylyp, saqtaldy.

Holdıng málimetine qaraǵanda, aýyl sharýashylyǵy tehnıkasynyń 5 birliginiń 4-eýin fermerler QazAgroQarjy arqyly satyp alýda (naryqtaǵy úlesi 78%) jáne aýyl turǵyndary alatyn 10 shaǵyn nesıeniń 9-yn Aýyl sharýashylyǵyn qarjylaı qoldaý qory arqyly alady (naryqtaǵy úlesi 94%).