«QazAgro» holdınginiń qarjy ınstıtýttarynyń negizinde aýyl sharýashylyǵy bankin qurý kerek - Q. Aıtahanov
ASTANA. 21 maýsym. QazAqparat - «QazAgro» ulttyq holdıngi qarjy ınstıtýttarynyń negizinde aýyl sharýashylyǵy bankin qurý kerek.
Búgin Senattyń jalpy otyrysynda depýtat Qýanysh Aıtahanov osylaı málim etti.
«UB tóraǵasy elimizdegi aýyl shaýrashylyǵy bankiniń úsh ret bankrotqa ushyraǵany týraly aıtyp ótti. Iá bul solaı, degenmen ol kezeń bizdiń ekonomıkamyzdyń quldyrap, toqyraýǵa túsken kezeń edi. 2008 jyldaǵy daǵdarystyń ózinde de alpaýyt bankterimiz toqyraýǵa ushyrap tozyp kete jazdady. Olardy memlekettik qoldaý arqasynda túzep aldyq», - dedi Qýanysh Aıtahanov.
Sonymen qosa senator aýyl sharýashylyǵyn qarjylandyrý óndiristiń basqa salalaryn qarjylandyrýdan erekshe ekenin atap ótti. Óıtkeni, aýyl sharýashylyǵynyń nysany - tiri organızmder, ósimdikter men janýarlar. Ekinshiden bul tabıǵatqa, klımatqa tikeleı baılanysty. Úshinshiden, aýyl sharýashylyǵy ónimderi tez buzylyp, tez óńdeýdi kerek etedi. Tórtinshiden, aýyl sharýashylyǵy taýarlary baǵa arqyly halqymyzdyń áleýmettik jaǵdaıyna tikeleı áser etedi. Besinshiden, aýyl sharýashylyǵynyń qarjylyq jáne óndiristik merzimi bir-birimen sáıkes kelmeıdi. Óndiristik merzim egis sebýden bastalyp, ónimdi jınaýmen aıaqtalsa, qarjylyq merzim budan uzaǵyraq.
«Ekinshi deńgeıli bankter sharýalarǵa nesıe berý úshin kepildikke olardyń jeri men ǵımarattaryn tehnıkalaryn alýdan bas tartady. Búgingi kúni ekinshi deńgeıli bankterdiń protfelinde olardyń aýyl sharýashylyǵyna baǵyttaǵan nesıe kólemi jyl saıyn tómendep, ol búgingi tańda nebári 3,6 paıyzdy ǵana quraıdy. Al «QazAgro» holdıngi arqyly beriletin nesıeler taýar óndirýshileriniń 5-6 paıyzyn ǵana quraıdy, onyń ózinde de tek qana iri sharýashylyqtarǵa beriledi. Sondyqtan da, agroónerkásip keshenin kúsheıtýdiń negizgi baǵyttarynyń biri retinde «QazAgro» holdınginiń qarjy ınstıtýttarynyń negizinde aýyl sharýashylyǵy bankin qurý kerek dep oılaımyn», - dedi senator Q. Aıtahanov.
Onyń aıtýynsha, aýylda respýblıka halqynyń 46 paıyzy turady. Al bank klıentteriniń sany 1 mln.-nan asady.
«Keden odaǵynda Reseı men Belarýs elinde sharýalardyń jeri men múlkin kepildikke alyp, uzaq merzimge arzan nesıe beretin bólimsheleri aýdandar men qalalarda ornalasqan agrobankter qyzmet etedi. Olaı bolsa bizdiń de aýyl sharýashylyǵy taýarlaryn óndirýshileriniń básekege qabiletti bolýy úshin osyndaı jaǵdaı jasalýy shart. Álemniń 90 elinde aýyl shaýrashylyǵy bankisi jumys isteıdi. Onyń ishinde, AQSh, Germanııa, Túrkııa, yrantsııa elderinde dál osyndaı bankter bar. Sondyqtan ad, biz de sharýalarǵa jaǵdaı jasaıtyn, ekinshi deńgeıli bankter sekildi jumys isteıtin bank bolýy shart. Alaıda, onyń ereksheligi paıyzdyq stavkalardy memleket esebinen tómendetý úshin sýbsıdııa bólýge tıispiz», - dedi Q. Aıtahanov.
