QazAgro holdınginiń basshysy bıylǵy astyqty satyp alý sharalaryn aıaqtaýdy usyndy - Úkimet otyrysy
ASTANA. 2 qarasha. QazAqparat /Rýslan Ǵabbasov/ -Búgin Úkimet otyrysynda "QazAgro" holdınginiń basshysy Asyljan Mamytbekov bıylǵy astyqty satyp alý sharalaryn aıaqtaýdy usyndy.
Onyń aıtýynsha, búginde josparlanǵan 970 myń tonna astyqtyń 732 myń tonnasy satyp alyndy Atap aıtqanda, jalpy josparlanǵan kólemde bul 76 paıyzdy quraıdy.
«Osymen satyp alý ótinimderin qabyldaýdy aıaqtaý usynylady. Sebebi, qolda bar astyq jetkilikti», - dedi A. Mamytbekov.
Onyń sózine qaraǵanda, bıylǵy eginnen satyp alynǵan astyq kólemi sonymen qosa ótken jylǵy astyqtyń qalǵany elimizdiń aldaǵy jylǵa qajettigin qamtamasyz etýge múmkindik beredi. Óz kezeginde Úkimet basshysynyń birinshi orynbasary Ómirzaq Shókeev A. Mamytbekovtiń osy pikirimen kelisetindigin jetkizdi.
«Men astyqty satyp alýdy aıaqtaý sharalaryn qoldaımyn. Sebebi, qazirgi kezdegi astyq kólemi tolyqtaı jetkilikti. Atap aıtqanda, artyq astyq kólemi qalyptasýda», - dep atap ótti Ó. Shókeev.
Osy oraıda Ó. Shókeev memorandýmdarǵa túzetýler engizip, bul astyq kólemin maqsatty oryndaý turǵysynda jaýapkershilikti jergilikti atqarý organdaryna belgileýdi usyndy. «Sebebi, «Azyq-túlik korporatsııasy» astyǵynyń nannyń arzandaýyna emes, kerisinshe paıdakúnemdik maqsatynda basqa bir naryqqa baratyn keıbir faktiler kezdesip jatady»,- dep atap ótti Úkimet basshysynyń birinshi orynbasary.
