«QazAgro» holdıngine júrgizilgen aýdıt qorytyndysy shyǵaryldy

NUR-SULTAN. QazAqparat - Esep komıtetinde «QazAgro» holdıngi men onyń enshiles uıymdary qyzmetiniń tıimdiligine júrgizilgen memlekettik aýdıt qorytyndysy jarııalandy, dep habarlaıdy QazAqparat tilshisi.

«Holdıng esepterinde usynylǵan qyzmettiń negizgi kórsetkishteri olardy oryndaý boıynsha ishinara nemquraıly qadamdardy baıqatady. Holdıngtiń uıymdastyrýshylyq qurylymynyń jetildirilmegeni kórinis tapqan, qyzmetterdiń qaıtalanýy faktileri anyqtaldy», - dedi Esep komıtetiniń múshesi Halıda Qambarova.

Esep komıtetiniń málimetinshe, 2007-2018 jyldar aralyǵyna memekettik resýrs esebinen agroónerkásip keshenin damytýǵa shamamen 1,6 trln teńge bólingen.

«Aktıvterdi tıimsiz basqarý saldarynan holdıngtiń kompanııalar toby 2017 jyldyń qorytyndysy boıynsha 126 mlrd teńge, 2018 jyly 119,1 mlrd teńge somasyna qarjylyq sharýashylyq qyzmetin shyǵynmen aıaqtady», - dedi ol.

H. Qambarovanyń sózine qaraǵanda, 2017-2018 jyldary qyzmetiniń shyǵynǵa ushyraǵan kezeńinde holdıng kompanııalar toptaryna 4,3 mlrd teńge mólsherinde syıaqy tólenip kelgen.

Budan buryn habarlanǵandaı, bıyl mamyr aıynyń sońynda Parlament Senaty Qarjy jáne bıýdjet komıtetiniń keńeıtilgen otyrysynda «QazAgro» holdıngin saýyqtyrý boıynsha qadamdardyń iske asyrylý máselesin kóterdi.

Osy oraıda ekinshi deńgeıli bankter aýyl sharýashylyǵy taýarlaryn óndirýshilerge nesıe bermeıtindigi, al «QazAgro» eki jyl boıy shyǵynmen jumys istep jatqandyǵy aıtyldy.

Begili bolǵandaı, «QazAgro» holdıngi» AQ-ny damytýdyń strategııalyq baǵdarlamasy ázirlenip jatyr.