«QazAgro» holdıngi Investıtsııalyq baǵdarlamalardy júzege asyrý jóninde ashyq otyrysyn ótkizdi
dep habarlaıdy QazAqparat.
«Investıtsııalyq baǵdarlamalardy júzege asyrý boıynsha biz apta saıyn jańa jobalardy qarastyryp, maquldanǵan jobalardyń júrgizilý barysyn, nesıelendirý boıynsha kezekti transhty ashý máselesin talqylap kelemiz. Al bundaı ashyq otyrysty ótkizý ıdeıasy Parlament Senatynyń depýtattarymen kezdesý barysynda kóterilgen bolatyn», dedi jıyndy ashyp sóz sóılegen «QazAgro» ulttyq basqarýshy holdıngi» AQ basqarma tóraǵasy Asyljan Mamytbekov.
Otyrystyń kún tártibinde holdıngtiń enshiles kompanııasy bolyp tabylatyn «QazAgrofınans» AQ usynǵan Qostanaı oblysy men Pavlodar oblysynda jemis-kókónis qoımasyn salý jónindegi jańa joba qaraldy. Atalǵan jobalar QR Ulttyq qorynan bólinetin qarjy esebinen Holdıngtiń ınvestıtsııalyq baǵdarlamasy sheńberinde júzege aspaqshy. Atap aıtqanda, «Ermek ı K» JShS jobasy boıynsha Pavlodar oblysynda 3 myń tonna jemis pen kókónisti saqtaıtyn jańa qoıma salý josparlanady. Al «Aqtoǵaı-Agro» JShS jobasy boıynsha Qostanaı oblysynda jalpy aýqymy 7 myń 50 tonna kókónis saqtaıtyn qoıma salý josparlanǵan.
Jobany qarjylandyrý úshin holdıng tarapynan birqatar talaptar da qoıylady. Máselen, usynalatyn jobanyń qosymsha qarjylandyrylýy 20 paıyz shamasynda bolýy shart. Budan bólek, usynýshynyń júzege asyrylatyn baǵytyndaǵy tájirıbelerine, jer telimderiniń, tehnıkasynyń bolýyna da nazar aýdarylady.
«Jobany qarjylandyrýdy maquldaý úsh kezeń boıynsha júrgiziledi. Atap aıtqanda, birinshi kezeńde nesıe komıtetinde, ekinshi kezeńde «QazAgro» holdınginiń basqarma otyrysynda, úshinshi kezeńde Dırektorlar keńesimen qurylǵan qoǵamdyq komıssııada joba qaralyp, sodan soń ǵana nesıe bólýge maquldanady», dedi Holdıng Basqarma tóraǵasynyń orynbasary Berik Beısenǵalıev .
