«QazAgro» holdıngi ınvestıtsııalyq baǵdarlamalar aıasynda 38,4 mlrd. teńgeni quraıtyn 32 jobany maquldady
ASTANA. Mamyrdyń 6-sy. QazAqparat /Qanat Mámetqazyuly/ ‑ Investıtsııalyq baǵdarlamalardy júzege asyrý bastalǵaly beri «QazAgro» ulttyq basqarýshy holdıngi» 38,4 mlrd. teńgeni quraıtyn 32 jobany maquldady. Bul týraly búgin «QazAgro» ulttyq basqarýshy holdıngi» AQ Basqarmasynyń ashyq otyrysynda málim boldy,
dep habarlaıdy QazAqparat.
Holdıng Basqarma tóraǵasynyń orynbasary Berik Beısenǵalıevtyń aıtýynsha, maquldanǵan 32 joba jalpy agrarlyq sektordyń 12 baǵytyn qamtıdy. «Bundaı jobalardyń basym bóligi azyq-túlik salasyndaǵy ımportqa táýeldilikti tómendetýdi qamtamasyz etedi ári elimizdiń agroónerkásiptik kesheniniń eksporttyq áleýetin arttyra túsedi dep boljap otyrmyz», dedi B. Beısenǵalıev.
Atalǵan ınvestıtsııalyq jobalardy qarjylandyrý operatorlary holdıngtiń enshiles kompanııalary bolyp tabylady. Atap aıtqanda, «Agrarlyq kredıttik korporatsııa» jáne «QazAgrofınans» AQ syıaqy men negizgi qaryzdy óteýdiń 2 jyldyq jeńildik kezeńin qosa alǵanda 6 paıyzdyq stavkamen nesıeni qamtamasyz etedi. Kredıtteýdiń jalpy merzimi jobalardyń baǵytyna qaraı 7 jyldan 12 jylǵa deıingi kezeńdi qamtıdy.
Toqtala ketetin taǵy bir jaıt, aǵymdaǵy jylǵy naýryzdyń 1-inen bastap «QazAgro» holdıngi ınvestıtsııalyq baǵdarlamalar sheńberinde ótinishterdi qaraý tártibin jeńildetip otyr. Jańa reglamentke sáıkes, jobalardy iriktep alý eki kezeńnen ǵana turatyn bolady.
