«QazAgro» holdıngi bıylǵy kóktemgi egis jumystaryn qarjylandyrýǵa 86,1 mlrd. teńge baǵyttaıdy - Premer-Mınıstrdiń orynbasary
ASTANA. Naýryzdyń 9-y. QazAqparat /Qanat Mámetqazyuly/ - «QazAgro» holdıngi bıylǵy kóktemgi egis jumystaryn qarjylandyrýǵa 86,1 mlrd. teńge baǵyttaıdy. Búgin QR Parlamenti Senatynda ótken «Óńir» depýtattyq tobynyń otyrysy barysynda QR Premer-Mınıstriniń birinshi orynbasary Ómirzaq Shókeev osylaı málim etti,
dep habarlaıdy QazAqparat.
Óz sózinde Ó. Shókeev respýblıka óńirleri úshin asa mańyzdy bolyp tabylatyn birqatar máselelerge toqtalyp ótti. Onyń aıtýynsha, jurtshylyqty janar-jaǵarmaıdyń barlyq túrlerimen qoljetimdi baǵa boıynsha qamtamasyz etý jáne munaı ónimderine ornyqty baǵany qalyptastyrý Úkimettiń basty sharýalarynyń biri bolyp tabylady.
«Úkimet munaı ónimderiniń jekelegen túrleriniń aınalymy men ónimine memlekettik retteý máselesi boıynsha qaǵıdatty sheshimder qabyldady. Bul jónindegi zań jobasy Parlamentke usynyldy. Búgingi kúni agroónerkásip kesheninde memlekettik qoldaýdyń tutastaı júıesi tıimdi júrgizilip otyr. Memleket esebinen tuqymdardy suryptaý, dızeldik otynnyń qunyn arzandatý, mıneraldy tyńaıtqyshtar jáne dalalyq sýarmaly jerler qyzmetterin qoldaý sekildi birqatar keshendi sharalar júzege asýda. Sonymen birge, qazirgi tańda aýyl sharýashylyǵy ónimin óndirýshiler memlekettik astyq satyp alýǵa, dalalyq jıyn-terim jumystaryna, tehnıka lızıngine qatysty kredıttik resýrstardy ıelene alady», dedi Ó. Shókeev.
Onyń aıtýynsha, 2010-2012 jyldary agroónerkásip keshenderiniń basym mindetterin sheshý maqsatynda «QazAgro» ulttyq holdıngine respýblıkalyq bıýdjetten 80 mlrd. teńge bólingen. «Budan bólek, aǵymdaǵy jylǵy shildeniń 1-ine deıin «Aýyl sharýashylyǵyn qoldaý qory» arqyly 500 mln. teńge bólý josparlanǵan. Bul shaǵyn taýar óndirýshilerge joldanatyn bolady. Onyń sharttary boıynsha kredıtteý merzimi 2 jylǵa esepteledi, zaem somasy 3 mln.-nan aspaıdy. Bul shaǵyn aýyl sharýashylyǵy taýarlaryn óndirýshiler úshin holdıng tarapynan ázirlengen jańa baǵdarlama bolyp otyr. Osylaısha, bıylǵy kóktemgi egis jumystaryna «QazAgro» holdınginiń jalpy qarjylandyrý somasy 86,1 mlrd. teńgeni quraıdy», dedi Ó. Shókeev.
