«QazAgro» Astananyń azyq-túlik beldeýi aýmaǵynda bes óndiristi iske qosady

ASTANA. 18 sáýir. QazAqparat - «QazAgro» Ulttyq basqarýshy holdıngi jyl aıaǵyna deıin ónimderi elordalyq aımaqqa baǵdarlanǵan bes óndiristik nysandy paıdalanýǵa berýdi josparlap otyr.

Bul týraly búgin baspasóz máslıhatynda holdınginiń basqarýshy dırektory Anas Baqqojaev aıtty.

Búginde «QazAgro» ulttyq holdıngi jelisi boıynsha Astananyń azyq-túlik beldeýin damytý aýqymynda jalpy kólemi 33,8 mlrd. teńgeniń 61 jobasy qarjylandyryldy.

Ulttyq holdınginiń kompanııalar toby qarjylandyrǵan iri jobalardyń, qurylystardyń jáne jańartý jobalarynyń ishinen Anas Baqqojaev jumyrtqa jáne qus eti baǵytyndaǵy segiz qus fabrıkasyn, alty taýarly-sút fermasyn, alty kókónis qoımasyn, tórt jylyjaı keshenin atady.

«Budan basqa, elorda azyq-túlik beldeýiniń qýaty 14,2 myń tonnalyq et óńdeıtin 25 jobasyna jáne qýaty 59,5 myń tonna bolatyn astyq óńdeý, nan, nan-bólke, makaron buıymdary, 1,5 mln. oram jaıma óndirisiniń 5 jobasyna qarjy ınvestıtsııalandy», - dedi ol.

Tutastaı alǵanda, Astananyń azyq-túlik beldeýine Aqmola oblysynyń 17 aýdany jáne Qaraǵandy oblysynyń 4 aýdany kiredi. Osy aýmaqta aýyl sharýashylyǵy óndirisi men óńdeý qyzmetin 80-nen astam kásiporyn júzege asyrýda.