«QazAgro» AÓK-ni nesıeleýge 60 mlrd. teńge bóledi

ASTANA. QazAqparat - Bıyl «QazAgro» Ulttyq basqarýshy holdıngi» AQ azyq-túlik kelisimshart korporatsııasy arqyly alǵashqy nesıelerdi berýdi bastaıdy. Bul týraly búgin OKQ brıfınginde holdıng basqarma basshysynyń mindetin atqarýshy Dáýren Maqajanov aıtty.

«Memleket basshysy bıyl da, odan keıingi jyldary da kóktemgi egis naýqany sharalaryn der kezinde uıymdastyrýdyń asa mańyzdy ekenin qadap aıtty. Osyǵan baılanysty, respýblıkalyq bıýdjetten nesıege arnalǵan 60 mlrd. teńge bólinip, ol «QazAgroǵa» berildi. Odan ári holdıng osy qarajatpen agroónerkásip keshenderin nesıeleıtin bolady» - dep túsindirdi ol.

D. Maqajanovtyń aıtýynsha, 2015 AÓK nysandaryn qarjylandyrýǵa birneshe arnalar tartylatyn bolady.

«AÓK-in qarjylandyrýǵa bıyl da, byltyrǵy sııaqty, azyq-túlik kelisimshart korporatsııasy, áleýmettik-kásipkerlik korporatsııalar tartylady», - dedi ol.

Atalǵan arnalar boıynsha 17 mlrd. 650 mln. teńge bólinedi jáne qazirgi ýaqytta ótinimder kelip jatyr.

«Meniń oıymsha, osy aptanyń sońyna deıin atalǵan baǵdarlama boıynsha alǵashqy nesıelerdi bere bastaımyz», - dep túıdi holdıng basshysynyń mindetin atqarýshy.