«QazAgro» 2016 jylǵy kóktemgi egis naýqanyna 60 mlrd teńge bólýdi josparlaıdy

ASTANA. QazAqparat - «QazAgro» ulttyq basqarýshy holdıngi 2016 jyldyń egistik naýqanyna daıyndyqty bastady. Kóktemgi egis jumystaryn qarjylandyrý kezindegi Holdıngtiń negizgi mindeti - nesıe resýrstaryn alý úshin otandyq aýylsharýashylyq taýar óndirýshileriniń múmkindikterin barynsha keńeıtý. Osy maqsatta «QazAgro» ekinshi deńgeıli 11 banktiń ókilderimen kezdesý ótkizdi. Bul týraly holdıngtiń baspasóz qyzmetinen habarlandy.

Kezdesý barysynda bankterdiń keńeıtilgen fılıaldary jelisin paıdalaný arqyly respýblıkanyń sharýashylyqtary men agroqurylymdaryn qarjylandyrý máseleleri talqylandy.

«2016 jylǵy kóktemgi egis jumystary aıasynda aýyl sharýashylyǵy taýaryn óndirýshilerdi qoldaýǵa «QazAgro» ulttyq holdıngi 60 mlrd.teńge bıýdjettik nesıe qarajatyn baǵyttaýdy josparlap otyr. Bul úshin atalǵan qarajatty qaryz túrinde holdıngtiń keıbir enshiles uıymdary men ekinshi deńgeıli bankterdiń arasynda bólý kózdeledi. Budan basqa, sharýashylyqtar men agroqurylymdardy qarjylandyrýǵa, sondaı-aq aýylsharýashylyq tehnıkasynyń lızıngine «QazAgro» holdınginiń kompanııalarymen jeke sektordyń jáne syrttan tartylǵan qarajat baǵyttalatyn bolady», - delingen baspasóz baıanynda.

Sarapshylardyń málimetteri boıynsha, buǵan deıin «QazAgro» ulttyq holdıngi Qazaqstandaǵy barlyq astyq óndirisiniń 50 paıyzyn qarjylandyrǵan. Jalpy alańy 6,5 mln. gektar aýmaqqa egilip, jınalǵan astyqty esepke alǵanda «QazAgro» holdınginiń qarajaty esebinen árbir ekinshi tonna astyq óndirilgen.

Bank ókilderimen kezdesý barysynda «QazAgro» holdıngi astyq óndirýshileri birlestiginiń qyzmeti men qarjylandyrý mehanızmin tanystyryp, bakterge jańa klıentter naryǵy sanalatyn aýylsharýashylyq kooperatıvterin qurý protsessine belsendi qatysý usynyldy.

Kezdesý nátıjesinde bankter Ulttyq holdıngtiń bastamalary men usynystaryna qyzyǵýshylyq tanytatynyn jetkizdi. Budan bólek, egistik naýqanynyń belsendi fazasy bastalǵanǵa deıin «QazAgro» holdıngimen óńirlerde kóshpeli jıyndar ótkizýdi josparlaǵan.