«Qazaeronavıgatsııa» basshysy keńesshisiniń ústinen tekserý júrip jatyr

ASTANA. KAZINFORM — Kólik mınıstri Nurlan Saýranbaev Úkimet úıindegi baspasóz máslıhatynda «Qazaeronavıgatsııa» sharýashylyq júrgizý quqyǵyndaǵy respýblıkalyq memlekettik kásiporny basshysy keńesshisiniń ústinen tekserý júrip jatqanyn málim etti. 

— «Qazaerronavıgatsııa» mekemesiniń bas dırektoryna 70 jastaǵy Faat Bogdashkın esimdi adam taǵaıyndalǵanyn Telegramm-arnalar qyzý talqylaǵan bolatyn. Sol adamnyń ózine keńesshi etip 65 jastaǵy adamdy taǵaıyndaǵany belgili boldy. Nege «Qazaerronavıgatsııa» mekemesine zeınetkerlerdi jınap jatyrsyzdar, — dep surady jýrnalıst.

Kólik mınıstri Faat Bogdashkın basshylyq qyzmetke konkýrs arqyly kelgenin alǵa tartty.

— Faat Bogdashkın negizi óte jaqsy maman. Ol konkýrstan ótti. Sodan keıin biz ony osy orynǵa taǵaıyndadyq. Keńesshisi týraly aqparat shyqqany ras. Biz ol boıynsha ishki tekseris ótkizip jatyrmyz, — dedi Nurlan Saýranbaev.

— Al bas dırektordyń laýazymyna nege dál osy 70 jastan asqan adam iriktep alyndy. Bizde sonda odan basqa aeronavıgatsııa salasyn meńgergen maman joq pa, — dep naqtylady BAQ ókili.

Mınıstr bul sheshim Faat Bogdashkınniń mol tájirıbesin eskerip qabyldaǵanyn aıtady.

— Ol konkýrstyq komıssııaǵa baılanysty ǵoı. Bogdashkın óte keremet maman. Sol jerde satylap ósip, birneshe jyl boıy bas dırektordyń birinshi orynbasary bolyp kele jatqan. Qazir ol jerde aeronavıgatsııanyń búkil tehnıkasyn jańalaý kerek. Sony jaqsy túsinetin osy kisi. Ol jaǵynan alǵanda sheshim durys. Al keńesshisi týraly tekseris ótkizip jatyrmyz. Zań boıynsha Faat Bogdashkın keńesshisin ózi alady. Biraq ol jerde basqa aqparattar shyǵyp jatyr ǵoı. Burynǵy qyzmetinde zańsyzdyqtar bolǵany týraly málimetti tekserip jatyrmyz, — dedi Nurlan Saýranbaev.

Buǵan deıin Kólik mınıstrligi Kazinform saýalyna joldaǵan jaýapta «Qazaeronavıgatsııa» respýblıkalyq memlekettik kásiporny Qazaqstan aspanynan qansha tabys taýyp otyrǵanyn málim etken edi.