Qaza tapqan úsh kenshiniń ólimine «ArselorMıttal Temirtaý» kompanııasy kináli ekendigi belgili boldy
QARAǴANDY. QazAqparat - «ArselorMıttal Temirtaý» AQ-nyń «Qazaqstan» kómir departamenti shahtasynda bolǵan toptyq qaıǵyly jaǵdaı sebepterin tekserý nátıjesi belgili boldy, dep habarlaıdy «QazAqparat» HAA tilshisi.
Investıtsııalar jáne damý mınıstrligi Indýstrıaldyq damý jáne ónerkásiptik qaýipsizdik komıteti respýblıkalyq memlekettik komıssııasy jumysshylardyń qaza tabýyna jumys berýshiniń kináli ekendigi týraly qorytyndyǵa keldi.
«Jumys berýshiniń 100-protsenttik kinási, jumysshylardyń 0-protsenttik kinási anyqtaldy», - dep málimdedi qorytyndyny respýblıkalyq memkomıssııa músheleriniń biri.
Komıssııa quramyna tek Indýstrıaldyq damý jáne ónerkásiptik qaýipsizdik komıtetiniń ǵana mamandary emes, sondaı-aq Reseı Federatsııasynyń kómir ónerkásibi salasyndaǵy sarapshylary da kirdi.
Komıssııa qorytyndysy úsh kenshiniń qaza tabý faktisi boıynga tergelip jatqan qylmystyq istiń materıaldaryna qosylý úshin Qaraǵandy oblysy Іshki ister departamentiniń tergeý basqarmasyna beriledi.
Eske salaıyq , 31 tamyzda tańǵy saǵat 4-ter shamasynda Qaraǵandy oblysy Shahtınsk qalasyndaǵy «Arselor Mıttal Temirtaý» kompanııasyna tıesili «Qazaqstan» shahtasynda kenet metan gazy taraǵan. Shahtada 136 adam evakýatsııalanyp, úsh kenshi - Rýstam Ahmetjanov, Valerıı Rýdenko men Maksım Shebanov qaza tapqan.
Quqyq qorǵaý organdary «Qazaqstan» shahtasynda eńbekti qorǵaý qaǵıdalarynyń buzylý faktisi boıynsha sotqa deıingi óndiris bastady. QR QK-niń 156-babynyń 4-bólimi «Abaısyzda eki nemese odan kóp adamnyń ólimine ákep soqtyrǵan eńbekti qorǵaý erejeleriniń buzylýy» boıynsha qylmystyq is qozǵaldy.
