Qaza tapqan serjant Arslan Qurmanbekovtyń anasyna III dárejeli «Aıbyn» ordeni tabystaldy
ALMATY. QazAqparat - Tótenshe jaǵdaı birinshi vıtse-mınıstri Ibragım Kúlshimbaev qaza tapqan serjanttyń anasy Qurmanbekova Baqytgúl Joldasbekqyzyna III dárejeli «Aıbyn» ordenin tapsyrý úshin onyń Almatyda turatyn otbasyna bardy, dep habarlaıdy QazAqparat.
Prezıdenttiń 15 mamyrdaǵy Jarlyǵymen qyzmettik boryshyn oryndaý kezinde kórsetken erligi men janqııarlyǵy úshin Almaty qalasy TJD Órt sóndirý jáne avarııalyq-qutqarý jumystary qyzmetiniń №7 ÓSB aǵa órt sóndirýshi-qutqarýshysy Arslan Qurmanbekov qaza tapqannan keıin ІІІ dárejeli «Aıbyn» memlekettik nagradasymen marapattaldy.
Mınıstrlik atynan I.Kúlshimbaev týystary men jaqyndaryna kóńil aıtyp, batyl ári erjúrek batyrdy tárbıelegeni úshin alǵysyn bildirdi.
«Siz óz ómirińizdi ártúrli jolmen ótkize alasyz. Ony bosqa, eshkimge paıdasyz etip nemese bireý úshin jaraqat alyp, tipti ólip ketýińiz múmkin. Osynyń ekinshisi bolsa, siz naǵyz batyrsyz. Arslan rýhy myqty, óz isiniń mamany retinde máńgi este qalady. Siz naǵyz erjúrek adamdy ósirdińiz!» - dedi general-maıor marqumnyń jaqyndaryna.
Azamattyq qorǵaý serjanty Qurmanbekov Arslan Joldasbekuly 1994 jyly 23 tamyzda Almaty oblysy Talǵar qalasynda dúnıege kelgen.
Eńbek jolyn 2015 jyldyń jeltoqsan aıynan bastap Almaty TJD «SPıASR» MM № 9 mamandandyrylǵan órt sóndirý bóliminiń órt sóndirýshi-qutqarýshysy bolyp bastady.
Almaty TJD «SPıASR» MM № 1 órt sóndirý bóliminde órt sóndirýshi, aǵa órt sóndirýshi-qutqarýshy bolyp jumys istedi.
Almaty TJD Órt sóndirý jáne avarııalyq-qutqarý jumystary qyzmetiniń № 7 órt sóndirý bóliminiń aǵa órt sóndirýshi-qutqarýshysy laýazymyna 2019 jyly taǵaıyndaldy.
Arslan jaýapty qyzmetker, kásibı kúresker jáne bilikti maman boldy. Jumysta ol eńbekqorlyǵy, ádildigi jáne mamandyqqa degen súıispenshiligi úshin baǵalandy.
2023 jylǵy 8 mamyrda Arslan Qurmanbekov Іle-Alataý tabıǵı parkindegi taý baýraıynda órtti sóndirý jónindegi jedel top quramynda qyzmettik boryshyn ótep, qaza tapty. Órt sóndirý kezinde taǵy bir maman zardap shekti.
