Qaza tapqan kenshilerdiń otbasylaryna járdemaqylar men tólemder taǵaıyndalady
ASTANA. KAZINFORM - Eńbek jáne halyqty áleýmettik qorǵaý mınıstrliginiń derekteri boıynsha Ulytaý oblysyndaǵy «Qazaqmys» MK kenishindegi TJ saldarynan qaza tapqan kenshilerdiń otbasylaryna bıýdjetten memlekettik járdemaqy jáne Memlekettik áleýmettik saqtandyrý qorynan (MÁSQ) asyraýshysynan aıyrylý jaǵdaıy boıynsha tólemder taǵaıyndalady.

Qaza bolǵan árbir kenshiniń asyraýynda balalary bolǵanyn eskere otyryp, olardyń otbasylaryna asyraýshysynan aırylý jaǵdaıy boıynsha memlekettik áleýmettik járdemaqy taǵaıyndalady. Járdemaqy mólsheri qaıtys bolǵan asyraýshysynyń asyraýyndaǵy adamdardyń sanyna jáne eń tómengi kúnkóris deńgeıine baılanysty.
Járdemaqynyń bul túri 8 jasqa deıingi balasy bar jumyssyz úsh anaǵa da taǵaıyndalady.
Qaza tapqan kenshilerdiń barlyǵy mindetti áleýmettik saqtandyrý júıesiniń qatysýshylary bolǵandyqtan, olardyń otbasyna memlekettik járdemaqydan bólek, asyraýshysynan aırylý jaǵdaıy boıynsha MÁSQ-dan áleýmettik tólemder taǵaıyndalady.
Osylaısha, asyraýyndaǵy bir adam úshin bıýdjetten tólenetin járdemaqy mólsheri 42 530 teńgeni, al MÁSQ-dan tólenetin tólemder – 141 523 teńgeni, asyraýynda bes adam bolsa, járdemaqy mólsheri 127 127 teńgeni jáne MÁSQ-dan tólenetin tólemder – 335 017 teńgeni quraıdy.
Qoldanystaǵy zańnamaǵa sáıkes, asyraýshysynan aırylý jaǵdaıy boıynsha tólemder balalary 18 jasqa tolǵanǵa deıin, al olar joǵary oqý oryndarynda kúndizgi bólimde oqyǵan jaǵdaıda – 23 jasqa deıin tólenedi.
Sondaı-aq qaza tapqan kenshiler otbasylarynyń barlyǵy «BJZQ» AQ-dan 369 608 teńge (94 AEK) mólsherinde jerleýge arnalǵan birjolǵy tólem alýǵa quqyly.
Sonymen qatar jumys berýshi kompanııa qaza tapqandardyń otbasylaryna ujymdyq shartta kózdelgen barlyq qajetti kómekti kórsetedi:
• Jerleý rásimin uıymdastyrý úshin 550 AEK mólsherinde tólemder (2 162 600 tg);
• Qaıtys bolǵan adamnyń otbasyna jyldyq ortasha jalaqynyń 10 eselengen mólsherinde tólem. Ortasha alǵanda bul – 84 mln-nan 124 mln teńgege deıin;
• Asyraýshysynan aıyrylý boıynsha aı saıynǵy tólemder;
• Balalardyń oqý aqysyn tóleý;
• Qaza tapqan jumysshylardyń nesıeleri men qaryzdaryn óteý.