Qaza tapqan feldsher isi: Úı qasbetin kútip ustamaǵany úshin PIK tóraǵasy aıyptaldy
ASTANA. KAZINFORM — Astana qalasynyń qylmystyq ister jónindegi aýdanaralyq sotynda jedel járdem feldsheri Uldana Myrzýannyń qazasy boıynsha is qaralyp jatyr. Turǵyn úı qasbetiniń opyrylýyna Páter ıeleri kooperatıviniń tóraǵasy Saýle Jubanııazova jaýapty dep tanylǵan. Prokýrorlar resmı aıyptaý aktisin jarııalady.
Saýle Jubanııazova QR Qylmystyq kodeksiniń 254-babynda kózdelgen qylmystyq quqyqbuzýshylyq jasady degen kúdikke ilingen.
Aıyptaý nusqasyna sáıkes, Táýelsizdik dańǵyly, 24B mekenjaıyndaǵy kóppáterli turǵyn úı 2005 jyly paıdalanýǵa berilgen. 2025 jylǵy 12 mamyrdan bastap atalǵan úıdiń PIK tóraǵasy qyzmetine Saýle Jubanııazova kelgen. Prokýrordyń málimetinshe, oǵan úıdiń ortaq múlkin tıisti deńgeıde kútip ustaýdy jáne ǵımarattyń qaýipsiz paıdalanylýyn qamtamasyz etý mindeti júktelgen.
Prokýrordyń aıtýynsha, PIK qaramaǵynda 2017 jylǵy úıdi tehnıkalyq tekserý jónindegi qorytyndy bolǵan. Qujatqa sáıkes, ǵımarattyń fızıkalyq tozý deńgeıi 31% bolǵan. Mamandar qasbetti, jertóleni jáne shatyrdy jóndeýge keńes bergen.
– S.Jubanııazova tehnıkalyq qorytyndy baryn bilgen jáne úıdiń ortaq múlkiniń jaǵdaıyn qadaǵalaý qajettiginen habardar bolǵan. Alaıda PIK tóraǵasy óz qyzmetin atqarǵan kezeńde qasbettiń tehnıkalyq jaǵdaıyna tıisti baqylaýdy qamtamasyz etpegen, qajetti vızýaldy tekserý júrgizbegen jáne aqaýlardy ýaqytyly anyqtamaǵan, – dedi Saıajan Serikova.
Memlekettik aıyptaýshy 2025 jylǵy 12 mamyr men 8 qarasha aralyǵynda PIK tóraǵasy qajetti tehnıkalyq tekserý júrgizýdi de bastamaǵanyn jáne jóndeý-qalpyna keltirý jumystaryn uıymdastyrmaǵanyn qosa aıtty.
Sottaǵy qurylys-tehnıkalyq saraptamanyń qorytyndysyna sáıkes, qasbettiń qıraýy kenetten emes, birtindep órbigen. Prokýrordyń túsindirýinshe, jaryqtar men basqa da zaqymdar uzaq ýaqyt boıy qalyptasqan, ári olardy tıisti vızýaldy tekserýde anyqtaýǵa bolar edi.
– Bul zaqymdar qıraýdyń buǵan deıin esh belgisi baıqalmaı, kenetten bolǵanyn kórsetpeıdi. Aqaýlar uzaq ýaqyt boıy qordalanǵan jáne úıdiń ortaq múlkin tıisti deńgeıde tekserip, anyqtap, keıin olardy joıý boıynsha qajetti sharalar qabyldaýǵa bolatyn edi, – dedi prokýror.
2025 jylǵy 8 qarashada saǵat 10:40 shamasynda úı qasbetiniń qaptamasyndaǵy kirpishter qulap, birneshe adam zardap shekti. Atap aıtqanda, Jankeldi Qalıev pen Aınur Nurpeıisovanyń densaýlyǵyna aýyr zııan kelgen. Gúlnar Qalıevanyń densaýlyǵyna ortasha aýyrlyqtaǵy zııan kelse, jedel járdem feldsheri Dilnaz Baızaqova jeńil jaraqat alǵan.
Eń aýyr zardap jedel járdem feldsheri Uldana Myrzýanǵa keldi. Ol oqıǵa ornyna zardap shekkenderge medıtsınalyq kómek kórsetý úshin kelgen. Kómek kórsetý barysynda qasbettiń keıbir bólikteri qaıta qulap, feldsher aýyr bas-mı jaraqatyn alǵan.
– Uldana Myrzýan alǵan dene jaraqattary densaýlyqqa aýyr zııan keltirý retinde baǵalandy jáne onyń ólimine tikeleı sebep bolǵan. Dárigerler qajetti medıtsınalyq kómek kórsetkenimen, ol medıtsınalyq mekemede esin jımastan qaıtys boldy, – dedi Saıajan Serikova.
Aıyptaý tarapy S.Jubanııazovanyń áreketsizdigi men onyń saldarynan bolǵan zardaptar arasynda sebep-saldarlyq baılanys bar dep esepteıdi. ıAǵnı prokýror qasbettiń tehnıkalyq jaǵdaıyna tıisti baqylaý jasalmaǵanyn, apat qaýpi bar ýchaskelerdi anyqtaý úshin qajetti sharalar qabyldanbaǵanyn, sondaı-aq tıisti tekserýler men jóndeý jumystaryn júrgizilmegenin atap ótti.
Osyǵan baılanysty Saýle Jubanııazovaǵa uıymdaǵy basqarý fýnktsııalaryn atqaratyn tulǵanyń óz mindetterine nemquraıly ári salǵyrt qaraýy saldarynan olardy tıisinshe oryndamaǵany, saldarynan adam ólimine jáne ózge de aýyr zardaptarǵa ákep soqqany boıynsha aıyp taǵylyp otyr.
Aıta keteıik, kelesi sot otyrysy 20 tamyz kúni saǵat 10:00-de ótedi.
Sot Ádilet Zeıneldiń jábirlenýshi bolýdan bas tartý jaıly ótinishin qanaǵattandyrmady.
