Ushaq apatynan qaza tapqan Ázerbaıjan azamattarynyń denesi Otanyna jóneltildi
AQTAÝ. KAZINFORM — 28 jeltoqsan kúni, saǵat 23:30 shamasynda Aqtaýdan áýe apatynda qaza tapqan 24 Ázerbaıjan azamatynyń (onyń ishinde úsheýi ekıpaj múshesi) denesi eline jóneltildi.
Sońǵy kúnderi qaza tapqandardyń denelerin anyqtaý boıynsha tynymsyz jumystar júrgizildi. Anyqtaý kezinde DNQ taldaýy júrgizilip, jaqyn týystary qatysty.
Eske sala ketsek, 25 jeltoqsan kúni bolǵan áýe apatynan 29 adam aman qaldy. Olarǵa Memleket basshysynyń tapsyrmasymen elordadan kelgen bilikti mamandar sapaly medıtsınalyq kómek kórsetti.
Medıtsınalyq kómek alǵan Ázerbaıjannyń 14 azamaty eline oraldy.
Mańǵystaý oblysynyń ákimdigi jergilikti atqarýshy organ ókilderi apattan zardap shekkenderdiń jáne qaza tapqandardyń otbasylaryna jan-jaqty qoldaý kórsetýdi jalǵastyratynyn málim etti.
Aqtaý mańynda ushaq apatynan qaza tapqan 24 adamnyń denesi búgin Bakýge jetkiziletinin jazǵan bolatynbyz.