Qaza tapqan 17 kenshiniń otbasyna áleýmettik tólem taǵaıyndaldy
QR Eńbek jáne halyqty áleýmettik qorǵaý mınıstrligi men Memlekettik áleýmettik saqtandyrý qory Kostenko atyndaǵy shahtada bolǵan apat saldarynan qaza tapqan 17 kenshiniń balalaryna járdemaqylar men tólemder taǵaıyndady, dep habarlaıdy Kazinform.
Mınıstrliktiń málimetinshe, qaıtys bolǵan 46 kenshiniń 21-iniń qamqorlyǵyndaǵylarǵa mynadaı áleýmettik qoldaý kórsetiledi:
- Respýblıkalyq bıýdjet qarajaty esebinen asyraýshysynan aıyrylý jaǵdaıy boıynsha memlekettik áleýmettik járdemaqy.
Osy járdemaqynyń mólsheri qaıtys bolǵan adamnyń asyraýyndaǵy adamdardyń sanyna qaraı aıqyndalady jáne olardyń aı saıynǵy mólsheri 37 322 teńgeden (1 balaǵa) 111 560 teńgege deıin (5 balaǵa) bolady.
Járdemaqynyń bul túri 8 jasqa deıingi bala kútimin júzege asyratyn jumys istemeıtin analarǵa da taǵaıyndaldy.
- Memlekettik áleýmettik saqtandyrý qorynyń (budan ári – MÁSQ) qarajaty esebinen asyraýshysynan aıyrylý jaǵdaıy boıynsha áleýmettik tólem.
Bul tólemniń mólsheri qaıtys bolǵan adamnyń tabysy men onyń áleýmettik saqtandyrý júıesine qatysý ótili negizinde anyqtalady. Tólemder mólsheri aıyna 56 myń teńgeden 272 myń teńgege deıingi aralyqta júredi.
Qoldanystaǵy zańnamaǵa sáıkes asyraýshysynan aıyrylý jaǵdaıy boıynsha tólemder balalar 18 jasqa tolǵanǵa deıin, al joǵary oqý oryndarynda kúndizgi bólimde oqyǵan jaǵdaıda 23 jasqa deıin tólenetinin eske sala keteıik.
Aıta ketý kerek, járdemaqylar men áleýmettik tólemder qaıtys bolý týraly kýálik negizinde taǵaıyndalady. Bul baǵyttaǵy jumys jalǵasyp jatyr.
