Qaza bolǵan júzdegen Arys turǵyny týraly jalǵan aıtqan azamat ustaldy

ARYS. QazAqparat - Arystaǵy jarylys kezinde áleýmettik jelilerge jalǵan aqparat taratqan azamattyń ústinen qylmystyq is qozǵaldy. Bul týraly oblystyq Polıtsııa departamentiniń baspasóz qyzmetinen málim etti, dep habarlaıdy QazAqparat tilshisi.

«Arystaǵy joıqyn jarylys kezinde áleýmettik jeli arqyly túrli aqparattar, sonyń ishinde eldi dúrliktirgen habarlamalar WhatsApp pen messendjerler arqyly keńinen taralyp, halyq arasynda biraz shý týdyrdy. Osyǵan baılanysty Túrkistan oblysy Polıtsııa departamentiniń polıtseıleri jedel áreket etip, jalǵan aqparat tartýshylardy izdestirý jumystaryn kúsheıtti. Nátıjesinde, jalǵan aqparat taratý arqyly zańǵa qaıshy is-áreket jasaǵan kúdikti azamat ustaldy. Ol óziniń oılanbastan jasaǵan is-áreketine ókinip, barsha halyqtan keshirim surady. Atalmysh kúdiktige baılanysty Arys APB qyzmetkerleri QR Qylmystyq kodeksiniń 274-babymen («Kórineý jalǵan aqparat taratý») sotqa deıingi tergep-tekserý amaldaryn júrgizýde», - delingen habarlamada.

Aıta keteıik, Arys qalasynyń turǵyny Almashan Sherıpov áleýmettik jelilerge taraǵan vıdeoda jarylystan birneshe júzdegen adamnyń kóz jumǵany týraly aıtqan bolatyn.

Al Túrkistan oblystyq Polıtsııa departamenti taratqan vıdeoda ol jalǵan sóılegeni úshin ókinetinin jetkizdi.

«2019 jyldyń 26 maýsymynda Arys qalasyndaǵy jarylystan 150-200 áskerı, 100 qarapaıym halyq mert boldy dep jalǵan aqparat taratqanym úshin Qazaqstan aldynda, búkil halyq aldynda, Arys qalasynyń halqy aldynda keshirim suraımyn. Qazaqstan halqyn, elimizdi sebepten-sebepsiz dúrliktirgenim úshin is-áreketime keshirim suraımyn», - deıdi vıdeoda Almashan Sherıpov.