Qaza bolǵan áskerılerdiń otbasyna jınalǵan qarajat qaıda túsedi: Biryńǵaı operator belgilendi
ASTANA. KAZINFORM — Mańǵystaý oblysynda qaza tapqan áskerı qyzmetshilerdiń otbasylaryna kómek jınaýdyń biryńǵaı resmı tetigi belgilendi. Búginde Qazaqstan Halyq Keńesiniń músheleri 815 mln teńge jınaǵan. Bul týraly Mańǵystaý oblysynyń ákimdigi málim etti.
Mańǵystaý oblysynda áskerı mindetterin oryndaý kezinde Kaspıı teńizi akvatorııasynda qaza bolǵan áskerı qyzmetshilerdiń otbasylaryna qosymsha materıaldyq kómek kórsetý maqsatynda biryńǵaı operator retinde oblys ákimdigi aıqyndaǵan uıym belgilendi.
Oblys ákimdigine qaza bolǵan áskerı qyzmetshilerdiń otbasylaryna materıaldyq kómek kórsetkisi keletin azamattardan, bıznes ókilderi men uıymdardan ótinishter túsýde. Osyǵan baılanysty atalǵan protsesti júıelep, kómek kórsetýdiń biryńǵaı resmı tetigin qamtamasyz etý, sondaı-aq alaıaqtyq áreketterdiń aldyn alý maqsatynda osyndaı sheshim qabyldandy.
Qorǵa túsetin barlyq qarajat tek qaza bolǵan áskerı qyzmetshilerdiń otbasylaryn qoldaýǵa baǵyttalady. Qarajattyń jumsalýy qatań túrde nysanaly maqsatqa saı jáne tolyq ashyqtyq qaǵıdattary negizinde júzege asyrylady. Qordyń qyzmeti men túsetin qarajattyń qozǵalysy memlekettik jáne quqyq qorǵaý organdarynyń baqylaýynda bolady.
Búginde Qazaqstan Halyq Keńesiniń músheleri 815 mln teńge kóleminde materıaldyq kómek jınady.
Qaza bolǵan áskerı qyzmetshilerdiń otbasylaryna kómek kórsetkisi keletin azamattar, bıznes ókilderi men uıymdar qarajatty qordyń resmı rekvızıtteri arqyly aýdara alady.
Alaıaqtyq áreketterdiń aldyn alý maqsatynda oblys ákimdigi azamattardy qarajatty jeke bank kartalaryna, jeke tulǵalardyń shottaryna nemese belgisiz rekvızıtterge aýdarmaýǵa shaqyrady.
Qordyń resmı rekvızıtteri:
«Ulttyq rýh» qoǵamdyq birlestigi
BSN: 090140013447
Bank: «Alatau City Bank» AQ
BSK: TSESKZKA
JSK: KZ03998PTB0000488655
Valıýta: KZT
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Áskerı qyzmetshilerdiń qaza bolýyna baılanysty qyzmetine salǵyrty qaraǵan birqatar laýazymdy tulǵa kúdikke ilindi.
