Qaza bolǵan órt sóndirýshiniń otbasyna qajetti kómek kórsetiledi – Abaı oblysynyń ákimi

SEMEI. QazAqparat – Abaı oblysynyń ákimi Nurlan Uranhaev Jarma aýdanynda kóz jumǵan órt sóndirýshiniń otbasyna qajetti kómek kórsetiletinin aıtty, dep habarlaıdy QazAqparat tilshisi.

Abaı oblysy ákimdigi baspasóz qyzmetiniń málimetine súıensek, aımaq basshysy tilsiz jaýmen kúreste erlikpen qaza bolǵan Aıdos Toǵyzbaevtyń otbasymen kezdesip, marqumnyń mezgilsiz qazasyna baılanysty kóńil bildirdi.

«Aıdos Erlanulynyń jarqyn beınesi jerlesteriniń jadynda máńgi saqtalady.

Marqumnyń otbasyna barlyq qajetti kómek kórsetiletin bolady», - dedi Nurlan Uranhaev.

№22 órt sóndirý beketiniń júrgizýshi-qyzmetkeri Aıdos Toǵyzbaev azamattyq qorǵaý organdarynda 2019 jyldan beri eńbek etken. Artynda áıeli men 5 balasy qaldy.

Eske salsaq, osyǵan deıin Abaı oblysynda jalyn sharpyǵan aýmaq 5000 gektarǵa jetkeni habarlanǵan bolatyn. Oblystyń Jarma aýdanynda 3 órt sóndirýshini kúıik shalyp, olardyń biri kóz jumdy. Denesin kúıik shalǵan eki órt sóndirýshiniń biriniń jaǵdaıy aýyr.

Órt sóndirýshiler Jarma aýdany Bozjyra aýyldyq okrýginiń Birinshi aýylynda qurǵaq shópten tutanǵan otpen kúresip jatqan bolatyn. Órt sóndirý avtotsısternasy otty sóndirý úshin sý jetkizip júrgen KamAZ kóliginen sý alyp jatqan kezde jel baǵyty ózgerip, órt avtotsısternaǵa qaraı lap qoıǵan. Jalyn ortasynda qalǵan adamdar men tehnıkany evakýatsııalaý múmkin bolmaǵan. Jan-jaǵynan bıiktigi eki metr qaraǵash aǵashtary jana bastaǵan.