Qaza bolǵan ormanshylardyń otbasy músheleri ushaqpen tegin usha alady

ASTANA. QazAqparat – Semeı ormanyndaǵy órtti aýyzdyqtaý kezinde kóz jumǵan ormanshylardyń otbasy músheleri jyl sońyna deıin FlyArystan kompanııasynyń ushaqtarymen tegin qatynaıdy, dep habarlaıdy QazAqparat.

«Qaza bolǵan otbasylardyń múshelerine Semeıden Astana, Almaty, Shymkent qalalaryna jáne keri baǵytta 2023 jyldyń sońyna deıin tegin júrý múmkindigi berildi.

Jalyndy aýyzdyqtaýǵa qatysyp jatqan órt sóndirýshilerge birjolǵy tegin ushýlar usynylyp otyr.

Sondaı-aq avıakompanııa Almaty men Astanadan gýmanıtarlyq júkterdi jetkizýge qolǵabys etýge daıyn», - delingen «Samuryq-Qazyna» kompanııasynyń Telegram-kanalynda.

Qaza bolǵan ormanshylardyń otbasylary, órt sóndirýge jumyldyrylǵan mamandar, gýmanıtarlyq júkti jınaýmen aınalysyp jatqan volonterler [e-mail] elektrondy mekenjaıyna jaza alady.

Eske salaıyq, 8 maýsym kúni tutanǵan Abaı oblysy «Semeı» ormany rezervatyndaǵy órtpen kúreske jumyldyrylǵan 14 ormanshy qaza boldy. Úsh aýyldyń turǵyndary evakýatsııalandy.

Prezıdent Qasym-Jomart Toqaev jumys saparymen Abaı oblysyna bardy.

12 maýsym elimizde Aza tutý kúni bolyp jarııalandy.

Alapat órtpen kúres áli júrip jatyr.