Qaza bolǵan mılıtsıonerlerdiń týystaryna materıaldyq kómek kórsetildi - Bishkek
BІShKEK. 20 qańtar. QazAqparat /Arnur Rahymbekov/ - Qyrǵyzstan elordasynda dinı lańkestik top músheleriniń qolynan qaza tapqan mılıtsıonerlerdiń týystary qatysqan shara ótti.
Esterińizge sala keteıik, 5 qańtarǵa qaraǵan túni Bishkektegi kóppáterli úılerdiń birinde qujattardy tekserý kezinde mılıtsııanyń úsh qyzmetkeri mert bolǵan edi. Qyrǵyzstannyń quqyq qorǵaý organdary qylmyskerlerdi anyqtady, olar dinı ekstremıstik toptyń músheleri bolyp shyqty. Olardy ustaý operatsııasynda «Alfa» arnaıy jasaǵynyń bir qyzmetkeri oqqa ushty.
«Qyzmettik boryshtaryn atqarý kezinde qaza tapqan ishki ister organdarynyń qyzmetkerleri óz Otandaryna adal qyzmet etýdiń jarqyn úlgisin kórsetti. Týǵan-týystary, áriptesteri, Qyrǵyzstannyń barsha halqy olardy umytpaıdy. Qaza tapqan tártip saqshylarynyń týǵan-týystary men jaqyndaryna memleket basshysy Roza Otynbaevanyń jáne jeke ózimniń atymnan kóńil aıtamyn», - dedi Qyrǵyz Prezıdentiniń keńesshisi Sultan Raev. Ol sondaı-aq mert bolǵandardyń týystaryna materıaldyq kómek tabys etti.
Eldiń ishki ister mınıstri Zarylbek Rysalıev óz sózinde, qazir qaza tapqandardyń otbasylaryna páter berý máselesi qaralyp jatqanyn jetkizdi.
Mılıtsıonerlerdiń týǵan-týystary óz kezekterinde, memleket tarapynan kórsetilip otyrǵan qamqorlyqqa alǵystaryn bildirdi.
