Qaza bolǵan qutqarýshy Asqar Zabıkýlınniń esimi Astanadaǵy qaı kóshege berilmek
Qala ákimdiginiń resmı saıtynda málim etilgendeı, búgin Astana onomastıka komıssııasynyń otyrysy ótti. Onyń barysynda adamdardy qutqaryp, erlikpen qaza tapqan Asqar Zabıkýlınniń esimin Esil aýdanynda («Úrker» turǵyn alaby) ornalasqan E-583 kóshesine berý týraly sheshim qabyldandy. Osy Esil aýdanynda órt sóndirýshi Saıat Abeev pen granatany keýdesimen jaýyp, terrorısti zalalsyzdandyrǵan polıtsııa kapıtany Ǵazız Baıtasovtyń esimimen atalǵan kósheler bar ekenin aıta keteıik.
Sondaı-aq onomastıka komıssııasy Asqar Zabıkýlın qyzmet etken №6 Mamandandyrylǵan órt sóndirý bólimine onyń esimin berip, mekeme aldyna bıýst ornatýdy usyndy. Budan bólek, órt sóndirýshiniń estelik sýretin Astana qalasynyń A.Pýshkın kóshesinde ornalasqan «Qutqarýshylar saıabaǵyndaǵy» aqparat taqtasyna ornalastyrý sheshimi qabyldandy. Bul saıabaqta qaıtys bolǵan qutqarýshylardy eske alýǵa arnalǵan aqparat taqtasy ornalastyrylǵan.
Qalanyń onomastıka komıssııasynyń otyrysynda qaralǵan usynystar endi Astana máslıhatynyń turaqty komıssııalarynyń jarııa tyńdaýyna, Astana qoǵamdyq keńesiniń qaraýyna jiberiledi.
Buǵan deıin qutqarýshy Asqar Zabıkýlınniń otbasyna Memleket basshysynyń tapsyrmasy boıynsha úsh bólmeli páterdiń kilti tabystalǵan bolatyn. Páter Asqardyń jubaıyna jeke menshikke berildi. Ákimdik málimetinshe, qazirgi ýaqytta páterde árleý jáne odan ári jıhazben tolyqtyrý jumystary júrgizilip jatyr.
Qutqarýshy Aıan Kempirovtiń otbasyna ıpotekany óteýge kómek kórsetildi. Onyń somasy 24 mıllıon teńgeni quraıdy. Sonymen qatar Asqar Zabıkýlın men Aıan Kempirovtiń otbasylaryna 6 mıllıon teńge somasyna nesıeler óteldi.
