Qaza bolǵan feldsher isi: Ádilet Zeınel áıelimen ótken sońǵy saǵattar týraly aıtyp berdi
ASTANA. KAZINFORM – Jedel járdem feldsheri Uldana Myrzýannyń qazasyna qatysty sotta jábirlenýshi Ádilet Zeınelden jaýap alý bastaldy.
Sottaǵy jaýabynda ol jubaıymen ótkizgen sońǵy saǵattary, 8 qarasha kúngi hat-habarlary jáne onyń Birinshi qalalyq aýrýhanaǵa jetkizilgenin qalaı bilgeni týraly aıtyp berdi.
Ádilet Zeıneldiń aıtýynsha, sol kezde Uldana Myrzýan onyń jubaıy bolǵan. 8 qarasha kúni tańerteń olar Qosshydan birge jumysqa shyqqan. Uldana Baıqońyr aýdanyndaǵy jedel járdem qosalqy stantsııasyna kúndizgi aýysymǵa feldsher bolyp barǵan. Al Ádilet sol kezde ózi jumys isteıtin Birinshi qalalyq aýrýhanaǵa kezekshilikke ketken.
Shamamen saǵat 07:45-te ekeýi de jumys oryndaryna jetip, hat almasýdy jalǵastyrǵan. Saǵat 08:00-de Ádilet Zeınel josparly otaǵa kirgen.
– Saǵat segiz jarym shamasynda josparly otany aıaqtap shyqtym. Hat almasýdy jalǵastyrdyq. Ol bir shaqyrtýǵa bara jatqanyn aıtty. Men de óz jumysymdy isteı berdim, – dedi qaza bolǵan feldsherdiń kúıeýi.
Shamamen saǵat 10:00-de Uldana kúıeýine qaıta habarlasqan jáne bir jerde qasbet qulaǵanyn jáne zardap shekken adam Birinshi qalalyq aýrýhanaǵa jetkizilýi múmkin ekenin jazǵan.
– Osydan keıin sóılespeı kettik. Ol habarlama jazýdy toqtatty, – dedi Ádilet Zeınel.
Shamamen saǵat 10:50-de er adamǵa aýrýhananyń ishki telefony arqyly qońyraý shalyp, jubaıynyń qabyldaý bóliminde jatqanyn habarlaǵan.
– «Jubaıyń Birinshi qalalyq aýrýhananyń qabyldaý bóliminde jatyr. Túsip, ony tanyp shyǵýyńyzǵa bolady» dep aıtty, – dedi Ádilet Zeınel.
Alǵashynda Á. Zeınel sengisi kelmegen. Sebebi buǵan deıin jubaıymen hat almasyp otyrǵan.
– Birinshi oılaǵanym – bul ázil shyǵar degen oı boldy. Óıtkeni ol maǵan buǵan deıin jazǵan edi. Men oǵan mán bermeı, jumysymdy jalǵastyra berdim, – dep túsindirdi jábirlenýshi.
Saǵat 10:55-te Ádiletke óz anasy qońyraý shalǵan. Anasy da buǵan deıin Birinshi qalalyq aýrýhananyń qabyldaý bóliminde jumys istegen jáne áriptesteri Uldananyń shokqa qarsy palatada jatqanyn habarlaǵan.
Osydan keıin ol ekinshi qabattaǵy operatsııalyq bloktan birinshi qabatqa túsip, qabyldaý bólimine barǵan.
– Ony tanydym da, «bul meniń áıelim» dedim. Óıtkeni ony aýrýhanaǵa belgisiz adam retinde jetkizgen. Men onyń Uldana Qaldarhanqyzy Myrzýan ekenin aıttym, – dedi jábirlenýshi.
Jábirlenýshi Ádilet Zeınelden jaýap alý jalǵasyp jatyr.
Eske sala ketsek, feldsher Uldana Myrzýan ólimine qatysty alǵashqy sot otyrysy 18 tamyzda bastalǵan edi.
Buǵan deıin sot jańa qorǵaýshynyń qylmystyq is materıaldarymen tanysýǵa qosymsha ýaqyt berý týraly ótinishin qanaǵattandyrmaǵan edi.
Sol sebepti qorǵaý tarapy sýdıa Merýert Abaevaǵa qarsylyq bildirdi.
