Qaza bolǵan áskerı qyzmetshilerdiń otbasylaryna jınalǵan qarajatty arnaıy komıssııa bóledi
ASTANA. KAZINFORM — Aqtaý qalasynda Mańǵystaý oblysynda áskerı qyzmetshilerdiń qaza bolýyna ákep soqqan tótenshe jaǵdaıdyń sebepterin tergeý jáne saldaryn joıý jónindegi Úkimettik komıssııanyń otyrysy ótti, dep habarlaıdy oblystyq ákimdiktiń baspasóz qyzmeti.
Otyrys barysynda ortalyq memlekettik jáne quqyq qorǵaý organdarynyń basshylary tergeý sharalarynyń barysy, sondaı-aq qaza bolǵan áskerı qyzmetshilerdiń otbasylary men zardap shekkenderge kómek kórsetý sharalary týraly baıandama jasady.
Alǵashqy tergeý áreketteriniń nátıjeleri týraly Qazaqstan Respýblıkasy Іshki ister mınıstriniń orynbasary Sanjar Ádilov baıandady. Onyń aıtýynsha, áskerı qyzmetshilerdiń qaza bolý faktisi boıynsha ІІM-niń áskerı-tergeý bólimshesi sotqa deıingi tergeý júrgizip jatyr.
— Búgingi tańda qylmystyq is aıasynda bes laýazymdy tulǵanyń kúdikti retindegi mártebesi protsessýaldyq turǵyda rásimdelip, olar Aqtaý qalasynyń ýaqytsha ustaý ızolıatoryna qamaldy. Olardyń qatarynda QR QK Áskerı-teńiz kúshteri Bas qolbasshysynyń birinshi orynbasary – shtab bastyǵy, eki áskerı bólimniń komandıri, teńiz jaıaý áskerleri rotasynyń komandıri jáne kater komandıri bar. Tergeý jáne protsessýaldyq sharalar tolyq kólemde jalǵasyp jatyr, qajetti saraptamalar júrgizilýde. Tergeý barysynda barlyq qatysy bar tulǵalardyń áreketterine qatań quqyqtyq baǵa berilip, kúdiktilerdiń tolyq quramy túpkilikti anyqtalady, — dedi Sanjar Ádilov.
Otyrysty qorytyndylaı kele, Úkimettik komıssııanyń tóraǵasy Qanat Bozymbaev memleket qaza bolǵan áskerı qyzmetshilerdiń otbasylaryna qoldaý kórsetý jónindegi barlyq mindettemeni tolyq kólemde óz moınyna alatynyn atap ótti. Zańda kózdelgen kepildi tólemder kidirissiz júzege asyrylady. Ár otbasyǵa turaqty túrde ataýly qoldaý kórsetý úshin jaýapty mamandar bekitiledi.
Sondaı-aq Qazaqstan Halyq Keńesiniń múshelerine, Quryltaı depýtattaryna, saıası partııalarǵa, kásipkerlerge, metsenattarǵa jáne barlyq janashyr azamattarǵa kórsetken yntymaqtastyǵy úshin alǵys aıtyldy. Azamattyq bastamanyń arqasynda arnaıy qorǵa qajetti qarajat jınaqtaldy. Osyǵan baılanysty qarajat jınaý jumysy aıaqtaldy dep jarııalandy.
Qor qarajatyn otbasylarǵa jáne zardap shekkenderge ashyq, ataýly ári ádil bólý maqsatynda Qazaqstan Halyq Keńesiniń múshesi, Mańǵystaý oblysy Qoǵamdyq keńesiniń tóraǵasy Bekmurat Júsipovtiń jetekshiligimen arnaıy komıssııa quryldy.
Quqyq qorǵaý jáne memlekettik organdarǵa qarajattyń maqsatty jumsalýyna qatań baqylaý ornatý tapsyryldy.
Tergeý barysy men jan-jaqty kómek kórsetý jumystary Úkimettik komıssııanyń baqylaýynda.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Sonymen qatar áskerı qyzmetshilerdiń qaýipsizdigine jaýapty tulǵalar kúdikke ilingeni týraly jazǵan edik.
Aıta ketelik Kaspııdegi tótenshe jaǵdaıdan keıin qutqarylǵan áskerı qyzmetshi esin jıǵan edi.
Búgin Kaspıı teńizinde joǵalǵan eki áskerı qyzmetshiniń denesi tabylyp, izdestirý operatsııasy aıaqtalǵan edi.
Sonymen qatyr Kaspııdegi áskerı qyzmetshilerdiń qazasyna baılanysty qylmystyq is eki bap boıynsha tergelip jatyr.
Qyzmetke salǵyrt qaraý jáne korabl júrgizý qaǵıdalaryn buzý boıynsha aýyr zardaptarǵa ákep soqqan qylmystyq quqyq buzýshylyqtar jasady degen kúdikpen Qazaqstan Respýblıkasy Qarýly Kúshteriniń joǵary jáne aǵa komandalyq quramyndaǵy jaýapty laýazymdy tulǵalar ustaldy.
