KAZ Minerals óz qyzmetkerleriniń balalary úshin kásipke jol ashpaq
ASTANA. KAZINFORM – 2025 jyly KAZ Minerals Toby talantty jastardy qoldaý baǵdarlamasynyń aıasyn keńeıtti. Endi jalpy bilim berý granttaryna kompanııanyń elimizdiń kez-kelgen aýmaǵyndaǵy qyzmetkerleriniń balalary úmitker bola alady, dep habarlaıdy Kazinform tilshisi.
Osy jyly Aqtoǵaı jáne Bozshakóldegi kásiporyndar oqýdyń jáne qajet bolǵan jaǵdaıda jatyn oryn shyǵynyn tolyǵymen qamtamasyz etetin 38 grant bóldi. Sonymen qatar, kolledj stýdentteri úshin aıyna 45 000, JOO stýdentteri úshin 55 000 teńgeni quraıtyn shákirtaqy qarastyrylǵan.
Baǵdarlama otandyq joǵary oqý oryndary men kolledjderde mamandardy daıyndaýǵa baǵyttalǵan. Búginge deıin 13 grant ıesi anyqtaldy, onyń beseýi – ınjenerlik jáne tehnıkalyq mamandyqqa oqýǵa sheshim qabyldaǵan kompanııa qyzmetkerleriniń balalary. Urpaqtar sabaqtastyǵynyń mysaly Aqtoǵaı men Bozshakól kenishterinde de kezdesedi.
Aleksandr Medıanık Bozshakól kenishinde 11 jyl boıy jumys isteıdi. Mamandyǵy – burǵylaý jáne jarylys sheberi. Onyń uly Anton «Taý-ken ınjenerııasy» mamandyǵyna oqýǵa tústi. Anton bala kezinen ákesiniń jumysyn qyzyqty ári mańyzdy sanaıtyn. Endi ózi de ken óndirý isinde jańa tehnologııalardy meńgerýge nıetti.
Erbol Dáribaev ta grant ıesi. Ol qazir Semeı geobarlaý kolledjinde «Tabıǵı resýrstardy qorǵaý jáne tıimdi paıdalaný» mamandyǵy boıynsha bilim alýda. Onyń Aqtoǵaı ken baıytý kombınatyndaǵy sýlfıd fabrıkasynda jóndeýshi-slesar bolyp jumys isteıtin ákesi Ádilbek Dáribaev baǵdarlama týraly bilip, ulyna oqýǵa qujat tapsyrýǵa keńes bergen. Ekologııa baǵytyn tańdaǵan Erbol aýanyń, sýdyń jáne jerdiń tazalyǵyna jaýapty mamandarsyz zamanaýı kásiporyndardyń damýy múmkin emes dep esepteıdi.
Taǵy bir jarqyn mysal – Rýslan Fathıev pen onyń uly Ámir. Bozshakólde jabdyqtardy jóndeý mamany bolyp jumys isteıtin Rýslan tehnıkanyń senimdiligi tolassyz óndiris kepili dep esepteıdi. Al Ámir transport jáne tehnologııa salasyndaǵy ınjenerııany tańdaǵan.
- Men burynnan tehnıkaǵa qyzyǵam, sol sebepti ınjenerııa – meniń sanaly tańdaýym, - deıdi Ámir.
Rýslan ulyn maqtan etedi jáne tehnıkalyq mamandyq onyń jarqyn bolashaǵyna negiz bolaryna senimdi.
2018 jyldan beri KAZ Minerals 159 talantty jasqa qoldaý kórsetti. Oqý aıaqtalǵannan keıin grant ıeleri aqysy tólenetin tájirıbeden ótip, sodan keıin turaqty jumysqa qabyldanyp kompanııanyń kadrlyq áleýetin arttyrady. Kompanııada jumys isteıtin qyzmetkerlerge de KAZ Minerals oqý ortalyqtary men basqa da bilim berý uıymdarynda biliktilikterin arttyrýǵa múmkindik bar.