KAZ Minerals Toby Petropavldaǵy sorǵy stantsııasynyń kúrdeli jóndeý jumysyn qarjylandyrdy
PETROPAVL. KAZINFORM - Petropavl qalasyndaǵy NS-1 birinshi deńgeıli kótergish sorǵy stantsııasynyń rekonstrýktsııasy aıaqtaldy. Jumysty KAZ Minerals Toby qarjylandyrdy, dep habarlaıdy Kazinform agenttiginiń tilshisi.
Petropavldaǵy sorǵy stantsııasy 1974 jyly iske qosylǵan. Sol ýaqyttan beri munda jóndeý jumysy júrgizilmegen. 2024 jylǵy sý tasqyny kezinde qala sýsyz qalǵannan keıin stantsııany jóndeý týraly sheshim qabyldanǵanda KAZ Minerals Toby kómekke keldi.
SQO ákimdigi men KAZ Minerals Tobynyń arasynda memorandýmǵa qol qoıyldy. Búginde Petropavl aýyzsýmen úzdiksiz qamtamasyz etilip jatyr. Al stantsııanyń sýǵa ketý qaýpi joq desek bolady, - deıdi SQO oblystyq energetıka jáne turǵyn úı-kommýnaldyq basqarmasy basshysynyń orynbasary Ermek Týshanov.
Jobanyń quny 3,2 mlrd teńge. Bir jyl ishinde «Stonehenge Construction» JShS merdiger kompanııasy kóp jumys atqardy.
- Joba óte aýyr boldy. Birinshi deńgeıli kóterý stantsııasy úzdiksiz jumys istep turǵan kásiporyn, sebebi qalany aýyz sýsyz qaldyra almaımyz. Jumys aımaqty sý alyp ketken kezde de toqtamady. Modernızatsııalaý jumysy rekordtyq qysqa merzimde aıaqtaldy. Barlyq qurylǵylar aýystyryldy. Eskirgen sorǵylardyń ornyna Grundfos (Danııa) fırmasynyń zamanaýı, qýatty únemdeıtin qondyrǵylary ornatyldy. Olardyń basty artyqshylyǵy – qorǵanys qabileti joǵary. Bul agregat sý basqanda da jumys isteı beredi. Stantsııany sýmen qamtamasyz etý júıesin de aýystyrdyq. Keshendi transformatorlyq podstantsııa men barlyq mańyzdy energetıkalyq qurylǵylardy 3,5 metr bıiktikke kóterdik. Odan bólek, jańa sorǵy stantsııasynyń avtomatty júıede jumys isteıtinin atap ótý qajet, - deıdi «Stonehenge Construction» JShS qurylys menedjeri Tımýr Jabaıqanov.
Strategııalyq mańyzdy nysan 96 myń abonentti sýmen qamtamasyz etedi. Onyń ishindegi 93 myńy – jeke tulǵalar.
- Stantsııanyń qaıta jóndeý jumysy mańyzdy sheshim. Byltyr nysandy sý basyp, qala aýyz sýsyz qalǵanda sýmen qamtamasyz etýdiń balama túrlerin izdestirýge májbúr boldyq. Stantsııa 24 kún jumys istegen joq. Endi onyń sýǵa ketý qaýpi azaıdy. Qondyrǵy halyqqa uzaq qyzmet kórsetedi degen úmittemiz, - deıdi «Qyzyljar sý» JShS bas dırektory Jeńis Sultanov.
Negizgi jumystarǵa qosa stantsııany aınaldyra bıiktigi 4,5 metr, uzyndyǵy 600 metr bóget turǵyzyldy.
Sorǵy stantsııasyn kúrdeli jóndeýmen qatar KAZ Minerals Toby sý tasqynynan zardap shekken otbasylarǵa da kómektesti. Kompanııa turǵyndarǵa 564 páter satyp alyp, 80 turǵyn úı qurylysyn jáne Petropavldyń «Birlik» yqshamaýdanyndaǵy 420 úıdiń ınjenerlik-kommýnıkatsııalyq ınfraqurylymyn qaıta jóndeý jumystaryn qarjylandyrdy.