KAZ Minerals pen NFC geobarlaý salasynda áriptes bolýǵa kelisti
ASTANA. KAZINFORM — KAZ Minerals Toby men NFC kompanııasy Qazaqstanda geologııalyq barlaý jaıly ózara túsiniktik pen áriptestik jaıly memorandýmǵa qol qoıdy. Taraptar ken oryndaryn izdeý úshin jasandy ıntellekt pen basqa da tehnologııalardy qoldanýdy josparlap otyr, dep habarlaıdy Kazinform agenttiginiń tilshisi.
KAZ Minerals pen CNMC korporatsııasynyń enshiles kompanııasy China Nonferrous Metal Industry’s Foreign Engineering and Construction Co., Ltd. (NFC), arasyndaǵy memorandýmǵa qol qoıý rásimi 19 qazanda Almatyda ótti.
KAZ Minerals jańa tehnologııalardy qoldaný jáne geologııalyq zertteýlerdiń tıimdiligin arttyrýǵa basa kóńil bóle otyryp, Qazaqstandaǵy geobarlaý qyzmetin damytýda. NFC kompanııasymen áriptestik osy jumystyń bir baǵyty jáne uzaq merzimdi seriktestiktiń jańa kezeńi bolmaq.
Taraptar Memorandým sheńberinde geologııalyq barlaýdyń qashyqtyqtan zondtaý, geofızıkalyq jáne geohımııalyq zertteýler, jasandy ıntellekt pen geologııalyq derekterdi 3D-modeldeý sekildi zamanaýı ádisterin qoldaný múmkindikterin qarastyrýǵa nıetti. Sondaı-aq, tarıhı geologııalyq derekterdi qaıta saraptaý, burǵylaýǵa qolaıly oryndardy anyqtaý jáne mıneraldy resýrstardy baǵalaýǵa erekshe nazar aýdarylatyn bolady.
Sonymen qatar, qujatta mamandar daıyndaý, zertteýler júrgizý men oqý baǵdarlamalaryn júzege asyrý múmkindikteri qarastyrylǵan. Ary qaraı áriptestiktiń jol kartasyn jasaý josparlanýda.
KAZ Minerals Dırektorlar keńesiniń tóraǵasy Oleg Novachýk kompanııalardyń birlesken jumys tájirıbesine toqtaldy.
— Aqtoǵaı men Bozshakóldegi nysandardy salý kezinde CNMC óziniń kásibı biliktiligin kórsetti, jáne bizdiń kompanııalar joǵary deńgeıde áriptes bola alatynyn dáleldedi. Biz CNMC korporatsııasymen birge álemdegi úzdik kásiporyndardy qurdyq, — dep atap ótti ol.
CNMC Dırektorlar keńesiniń tóraǵasy Ven Gan Qazaqstan men KAZ Minerals Tobynyń sheteldik seriktester úshin mańyzdylyǵyna toqtaldy.
— Bizdiń kompanııa úshin Qazaqstan aımaqtaǵy eń mańyzdy el, al KAZ Minerals — eń mańyzdy strategııalyq seriktes. Biz kúsh biriktirý arqyly georbarlaý salasyndaǵy jumysty damytyp, taý-ken sektoryna birlesip ınvestıtsııa salý múmkindigin qarastyramyz, — dedi Ven Gan.
KAZ Minerals pen NFC arasyndaǵy seriktestikke 10 jyldan asty. Osy aralyqta NFC Bozshakóldegi sýlfıdti jáne kaolındelgen kendi qaıta óńdeý fabrıkalary men Aqtoǵaıdaǵy sýlfıdti rýdany qaıta óńdeý fabrıkasyn salyp, paıdalanýǵa berdi.
