KAZ Minerals Orlov shahtasynda qaıtys bolǵan jigit týraly aqparat berdi
ÓSKEMEN. QazAqparat - KAZ Minerals kompanııalar tobynyń baspasóz qyzmeti Shyǵysy Qazaqstandaǵy Orlov kenishiniń aýmaǵynda jazym bolǵan jigit týraly aqparat berdi, dep habarlaıdy QazAqparat tilshisi.
Kompanııanyń Shyǵys Qazaqstan oblysy boıynsha buqaramen baılanys menedjeri Ermek Dúzkenovtiń aıtýynsha, opyrylǵan taý jynysynyń astynda qalǵan bekitýshi Abaı aýdanynyń týmasy bolǵan.
«Qaıtys bolǵan jigit 1985 jyly Abaı aýdanynda dúnıege kelgen. Artynda 2 balasy qaldy. Bekitýshi bolyp jumys istep júrgen. Tóbedegi tas kesegi qulaǵanda qasyndaǵy jigit qashyp úlgergen. Al marqum kesektiń týra astynda turǵandyqtan, qashyp kete almaǵan», - deıdi Ermek Dúzkenov.
Oqıǵanyń anyq-qanyǵyn arnaıy qurylǵan tergeý komıssısıasy anyqtap jatyr. KAZ Minerals kompanııasy jazym bolǵan kenshiniń otbasyna qansha ótemaqy tóleý kerektigin de osy komıssııa anyqtaıdy.
«Kásiporynnyń ujymdyq kelisimsharty boıynsha, qaıtys bolǵan bekitýshini jerleý shyǵyndaryna jumys berýshi qarjylaı atsalysatyn bolady. Onyń syrtynda kásipodaq ta kómektesip jatyr. Al qaıǵyly oqıǵaǵa baılanysty qansha ótemaqy tólenetinin tergeý komıssııasy sheshedi. Jalpy mundaı jaǵdaılarda kóbinese jazym bolǵan jumysshynyń bir jyldyq eńbekaqysynyń 10 esesi tólenip jatady. Degenmen, bul naqty dep aıtýǵa ázir erte. Naqty soma komıssııa jumysy aıaqtalǵan kezde ǵana belgili bolady», - deıdi menedjer.
Eske salsaq 13 shilde kúngi saǵat 3.00-de Shyǵys Qazaqstandaǵy Orlov shahtasynyń aýmaǵynda kenish opyrylyp, sonyń saldarynan bir adam mert bolyp, bir adam aýrýhanaǵa túsken bolatyn.
